Սոցցանցերի հայկական տիրույթում մի շարք օգտատերեր բողոքում են, որ ՌԴ-ի դեմ պատժամիջոցների պատճառով չեն կարողանում առցանց ավտոպահեստամասեր պատվիրել, հայաստանյան շուկայում եղածն էլ անհամեմատ թանկացել է։ Պարզվում է՝ պատժամիջոցների պատճառով Ռուսաստանում ավտոմասերի գները 100%-ով բարձրացել են, ինչ-որ մասեր էլ ընդհանրապես չկան շուկայում, իսկ Հայաստանը հիմնականում հենց Ռուսաստանից էր պատվիրում դրանք։ Ավտոշուկայի այս ճգնաժամի մասին Sputnik Արմենիան զրուցել է ավտոմասնագետ Արման Հակոբյանի հետ։
Հակոբյանը նշեց՝ Ռուսաստանից պատվիրվում էր գրեթե ամեն ինչ, երրորդ երկրի արտադրանքն էլ, քանի որ շուկան այնտեղ շատ մեծ է, սակայն հիմա ռուսական բազաները դատարկվել են պատժամիջոցների պատճառով, ռուսական շուկայում նույնիսկ ինչ-որ ապրանքների պակասորդ կա։
Այս դեպքում հայկական շուկան ի՞նչ այլընտրանքներ ունի․ նախ՝ քանի որ Ռուսաստանից մեքենայի յուղ չի բերվում, հիմա այլընտրանքներ են մնացել Իրանն ու Թուրքիան։ Վերջինից ուղիղ ներկրվում են ավտոպահեստամասերը։ Հայաստան նաև ավտոպահեստամասեր են գալիս Վրաստանից։ Օրինակ՝ Չինաստանից նավով գալիս են Վրաստան, այնուհետ Վրաստանից բերվում Հայաստան, բայց այստեղ էլ «Վերին Լարսի» անցակետում առաջացող խցանումներն են խնդիր դառնում, Վրաստանից չի լինում արագ բերել։ Լարսի անցակետի խցանումների լուծման դեպքում էլ, միևնույնն է, Հակոբյանի կարծիքով, առաջացած ճգնաժամը չի լուծվի։
«Ինչ-որ չափով լուծում կլինի, բայց շատ ցածր տոկոսով, միայն Լարսով չի լինի, ռուսական շուկան պետք է բացվի, սկսի աշխատել այնպես, ինչպես առաջ էր աշխատում, որ նոր այստեղ հարցերը լուծվեն»,- ասաց Հակոբյանը։
Հայկական շուկայում սկսել են նաև Դուբայից շատ ներկրել՝ ռուսականի չլինելու պատճառով, բայց Դուբայից բերված ապրանքն էլ թանկ է։ Այս դեպքում հայ պատվիրատուները կամ ներկրողները, իհարկե, այլընտրանք ունեն, բայց ինչ-որ պահեստամասեր գուցե չգտնեն կամ շատ թանկ գտնեն։
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 44–րդ օրը։