ԵՐԵՎԱՆ, 7 ապրիլի – Sputnik. Կանադայի վարչապետ Ջասթին Թրյուդոն հայտարարել է, որ ռուսաստանցի դիվանագետների արտաքսումը Կանադայի օգտին չէ։
Նա նշել է, որ չի հետևելու այլ երկրների օրինակին և չի արտաքսելու դիվանագետներին, քանի որ հավանական հայելային պատասխան չի ուզում ստանալ։
«Մենք պետք է շատ զգույշ լինենք։ Մենք չենք ցանկանում այս ճգնաժամային պահին զրկվել Մոսկվայի մեր ռեսուրսներից, երբ լուրջ դիվանագիտական հարցեր են առաջանում», - Թրյուդոյի խոսքը մեջբերում է Radio Canada-ն։
Կանադայի վարչապետի խոսքով՝ երկրում գտնվող ռուս դիվանագետներն ապատեղեկատվություն չեն տարածում, իսկ նրանց արտաքսման խորհրդանշական ժեստն իր վատ հետևանքները կունենա:
Նշենք, որ Ուկրաինայում ռազմական գործողության մեկնարկից հետո Արևմուտքի երկրները սկսել են արտաքսել ռուսաստանցի դիվանագետներին։ Ըստ ՌԻԱ Նովոստիի հաշվարկների՝ մեկ ամսում մոտ 300 մարդ է արտաքսվել, և այդ թիվը կավելանա, քանի որ առայժմ ոչ բոլոր երկրներն են հրապարակել արտաքսվող ռուսաստանցիների թիվը:
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 43–րդ օրը։