ԵՐԵՎԱՆ, 7 ապրիլի – Sputnik. ՀՀ վարչապետ Նիկոլ Փաշինյանը շնորհավորել է Մայրության և գեղեցկության տոնը, հայտնում են կառավարության մամուլի ծառայությունից։
«Սիրելի՛ կանայք՝ մայրեր, քույրեր, դուստրեր, ջերմորեն շնորհավորում եմ ձեզ Մայրության և գեղեցկության տոնի առիթով, որը կանանց մեկամսյակի գագաթնակետն է: Հայաստանը, թերևս, բացառիկ երկիր է կանանց մեկամսյակի գոյության իմաստով: Այսպես ստացվել է հանգամանքների բերումով, բայց սրա մեջ արդիական մեծ օրակարգ կա, որովհետև մեր երկրի բնակչության մեծամասնությունը կանայք են»,– ասված է Փաշինյանի շնորհավորական ուղերձում։
Նա նշել է, որ մեկամսյակին տղամարդիկ ընդգծում են գեղեցկությունը, սերը, հարգանքը, սակայն այս տարի նա հատկապես ցանկանում է ընդգծել կնոջ ուժը, պոտենցիալը, վճռական դերը, քանի որ Հայաստանի առջև ծառացած խնդիրները լուծելու համար անհրաժեշտ է կանանց լիարժեք ներգրավվածություն հանրային կյանքի բոլոր բնագավառներում՝ սկսած տնտեսությունից, մինչև հանրային կառավարման, իրավապահ, անվտանգային ոլորտներ։ Նրա խոսքով` այդ բնագավառներում կանանց պոտենցիալը չներգրավելը նշանակում է երկրի զարգացման առանց այն էլ սահմանափակ հնարավորությունները կիսատ օգտագործել:
Փաշինյանը շեշտել է` ժողովրդագրական խնդիրների լուծման առումով կանայք բացառիկ դերակատարում ունեն, և երկրում իրավիճակի հաղթահարման գործում կանանց դերը վճռական է:
«Այսօրվա առիթով խոնարհումի ամենաջերմ խոսքեր եմ հղում հանուն հայրենիքի պաշտպանության նահատակված մեր եղբայրների մայրերին, կանանց, քույրերին ու դուստրերին` ընդգծելով, որ նրանք այսօրվա իմ ասելիքի լիարժեք հասցեատերն են և մեր նահատակների անկատար նպատակների իրագործումը պետք է ապրելու, արարելու խթան լինի նաև նրանց և մեր բոլորի համար»,– նշել է վարչապետը:
Նա մաղթել է, որպեսզի Մայրության և գեղեցկության այս օրը լավատեսության ու գարնան մի նոր էջ բացի Հայաստանի համար:
Նշենք, որ ապրիլի 7-ին Հայաստանում նշվում է մայրության, գեղեցկության և սիրո տոնը: ՀՀ Տոների ու հիշատակի օրերի մասին օրենքում այս տոնն ամրագրվել է 1995թ.-ին՝ ՀՀ առաջին գումարման Ազգային ժողովի կողմից, բայց տոնի խորհուրդը կրոնական է։
Ամեն տարի ապրիլի 7-ին Հայ Առաքելական Սուրբ եկեղեցին նշում է Ս. Մարիամ Աստվածածնի Ավետման տոնը: Այդ օրը հրեշտակապետը Մարիամ Աստվածածնին տեղեկացրել է, որ նա հղի է, և իր պտուղն Աստծո որդին է։