ԵՐԵՎԱՆ, 7 ապրիլի – Sputnik. Բրյուսելյան եռակողմ հանդիպմանը քննարկումը եղել է Հայաստան–Ադրբեջան հարաբերությունների և նախկինում ձեռք բերված պայմանավորվածությունների կատարման ու փոխվստահության մթնոլորտի ձևավորման մասին։
Այսօր լրագրողների հետ ճեպազրույցում այս մասին ասաց ՀՀ ԱԺ պետաիրավական հարցրի մշտական հանձնաժողովի նախագահ Վլադիմիր Վարդանյանը` մեկնաբանելով հանդիպմանը հաջորդած հայտարարություններում Արցախի խնդրի որևէ հիշատակության բացակայությունը։
«Բազում հարցերում, դիտարկումներում, բազում հայտարարություններում, ըստ էության ընդգծվել են Արցախի ժողովրդի իրավունքների հետ կապված հարցերը, և ընդգծվել է, որ սա հարց է, որը պետք է կարգավորվի` ելնելով նրանից, որ մենք ունենք ժողովուրդ, և այդ ժողովուրդն ունի որոշակի իրավունքներ, որոնք պետք է իրագործվեն»,– ընդգծեց Վարդանյանը։
Բանակցություններն Ադրբեջանի ներկայացրած 5 կետերի շրջանակներում վարելու մասին դիտարկմանը Վարդանյանն արձագանքեց, որ բանակցություններում կարևորը ճկունությունն է ու այնպիսի իրավիճակ չստեղծելը, որը կարող է խոչընդոտել գործընթացին։
«Տվյալ պարագայում ներկայացվել են առաջարկներ, կոնտրառաջարկներ` ՀՀ–ի կողմից, Մինսկի խումբը տեղեկացված է այդ հարցերի և առաջարկների վերաբերյալ։ Գործընթացը շարունակվելու է»,–ասաց նա։
Հանձնաժողովի նախագահը խորհուրդ տվեց բոլոր հուզող հարցերի պատասխանները չփնտրել դիվանագիտական տեքստերում, այլ փորձել տեսնել տողատակերը։ Օրինակ` փոխգործակցության, անվտանգության մթնոլորտի ձևավորման մասին ձևակերպումն, ըստ նրա, ենթադրում է նաև որոշակի միջոցառումների ձեռնարկում, որոնք հետագայում հնարավորություն կտան խուսափել միջադեպերից։
Ուստի լրագրողները նաև փորձեցին ճշտել` երեկվա հանդիպմանը հաջորդած պաշտոնական հաղորդագրության մեջ հիշատակված նոյեմբերի 9-ի եռակողմ հայտարարության դրույթների իրագործման մասին հիշատակումն արդյո՞ք նշանակում է, որ ադրբեջանցիները պետք է հեռանան Քարագլխից։
«Արցախում տեղի ունեցածը, գիտեք, դատապարտվել է և՛ ՄԽ համանախագահ բոլոր երկրների կողմից, և՛, ըստ էության, որոշակի պահանջներ են ներկայացվել Ադրբեջանին։ Բրյուսելում քննարկման ենթակա հարցերի մեջ առավելապես ընդգրկված են եղել հարցեր, որոնք վերաբերում են Հայաստան–Ադրբեջան հարաբերությունների հստակեցմանը»,– պատասխանեց Վարդանյանը` հավելելով, որ բրյուսելյան հանդիպումն ավարտվել է ուշ գիշերը, և դրա մանրամասները դեռ հայտնի չեն։
Իշխող քաղաքական ուժի ներկայացուցիչը հույս հայտնեց, որ որոշ մանրամասներ հայտնի կդառնան մոտ ապագայում։
Ապրիլի 6-ին Բրյուսելում կայացել է ՀՀ վարչապետ Նիկոլ Փաշինյանի, Ադրբեջանի նախագահ Իլհամ Ալիևի ու Եվրոպական խորհրդի նախագահ Շառլ Միշելի եռակողմ հանդիպումը։ Ըստ պաշտոնական հաղորդագրության` հանդիպմանը պայմանավորվել են մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով:
Եռակողմ հանդիպումից հետո Միշելը հայտարարեց, որ որոշել են հստակ գործընթաց սկսել խաղաղության բանակցությունների և հավանական խաղաղության պայմանագրի համար։
Մինչ եռակողմ հանդիպումը Նիկոլ Փաշինյանն առանձնազրույց էր ունեցել Եվրոպական խորհրդի նախագահ Շառլ Միշելի հետ` ներկայացնելով ադրբեջանական ստորաբաժանումների վերջին գործողությունների հետևանքով Արցախում ստեղծված իրավիճակը, հումանիտար խնդիրներն ու ընդգծել միջազգային հանրության հասցեական արձագանքի անհրաժեշտությունը:
Եռակողմ հանդիպումից առաջ Շառլ Միշելի հետ առանձնազրույց էր ունեցել նաև Ադրբեջանի նախագահ Իլհամ Ալիևը։
Մինչ Բրյուսել մեկնելը Փաշինյանը հայտարարել էր, որ մտադիր է Ադրբեջանի նախագահի հետ համաձայնեցնել խաղաղ բանակցությունների մեկնարկի հարցերը: