ԵՐԵՎԱՆ, 7 ապրիլի – Sputnik. 143 երկրի ավելի քան 100 հազար մարզիկի միավորող Օլիմպիականների համաշխարհային ասոցիացիայի գործադիր կոմիտեն (WOA) անսպասելիորեն հանդես է եկել ռուսաստանցի մարզիկներին մրցումներից հեռացնելու դեմ։
WOA գործադիր կոմիտեն նշում է, որ Օլիմպիական խարտիայի 4-րդ և 6-րդ հոդվածներում շարադրված օլիմպիզմի հիմնական սկզբունքները պետք է պահպանվեն մշտապես և որ օլիմպիականների ու մարզիկների, որպես առանձին անձանց, մարզական միջոցառումներին մասնակցելու իրավունքին պետք է աջակցել և խրախուսել։
WOA–ի գործադիր կոմիտեն հայտարարել է, որ մրցումներին նրանց մասնակցությանը կամ չմասնակցելուն պետք է անհատական մոտեցում ցուցաբերվի։ Միևնույն ժամանակ նշվում է, որ գործադիր կոմիտեն հասկանում է և հարգում ՄՕԿ–ի խորհուրդները։
Ինչպես նկատում է Սպորտ Էքսպրեսը, սա ասվել է անկախ նրանից, որ WOA–ն ՄՕԿ–ի հետ ասոցացվող կառույց է, որը մինչ օրս բավական կոշտ դիրքորոշում է զբաղեցնում միջազգային մրցումներին ռուսաստանցիների մասնակցությունը թույլ տալու առնչությամբ։
Նշենք, որ Միջազգային օլիմպիական կոմիտեն փետրվարի վերջին խորհուրդ է տվել միջազգային մարզական ֆեդերացիաներին թույլ չտալ ռուսաստանցի և բելառուս ատլետների մասնակցել մրցումներին Ուկրաինայի իրավիճակի պատճառով։ Մի շարք միջազգային ֆեդերացիաներ հետևել են այդ խորհրդին։