ԵՐԵՎԱՆ, 7 ապրիլի – Sputnik. ԱԺ նախագահ Ալեն Սիմոնյանի մեքենան ուղեկցելու համար 3 նոր մեքենա են ուզում գնել։ Հարցն ընդգրկված է կառավարության այսօրվա նիստի օրակարգում. այն չզեկուցվող հարցերից է։
Այսպես, Ազգային ժողովը ձեռք կբերի Toyota ընկերության RAV 4 մոդելի մարդատար 3 ամենագնաց մեկ անձից գնման ընթացակարգով։ Կառավարությունը մեքենաները գնելու համար 54 մլն դրամ կտրամադրի։
«ԱԺ նախագահին սպասարկող BMW 750 Li ծառայողական մեքենային որպես ուղեկցող շահագործվող TOYOTA LC PRADO 2.71, TOYOTA LC PRADO 4.0GA և NISSAN X-TRAIL 2.01 մեքենաներն իրենց տեխնիկական բնութագրով չեն ապահովում ԱԺ նախագահի ծառայողական մեքենայի անվտանգ և ապահով տեղաշարժը: ԱԺ ավտոտնտեսությունում առկա տրանսպորտային միջոցները չեն կարող շահագործվել ՀՀ ԱԺ նախագահի ուղեկցման համար»,- ասված է նախագծի հիմնավորման մեջ։
Բացի այդ, ասվում է, որ «Տոյոտա Երևանը» զեղչեր է առաջարկել, ինչի համար էլ հենց այդ ընկերությունից կգնեն նոր մեքենաները։
Հիշեցնենք, որ կառավարությունը 90 մլն դրամ էր հատկացվել ԱԺ նախագահին նոր մեքենա գնելու համար. Սիմոնյանի համար ձեռք է բերվել նոր` «BMW 750 xDrive LCi» մակնիշի ավտոմեքենա։