ԵՐԵՎԱՆ, 6 ապրիլի – Sputnik. ՌԴ նախագահի մամուլի քարտուղար Դմիտրի Պեսկովը չի բացառել արևմտյան երկրների հետ դիվանագիտական հարաբերությունների խզման հնարավորությունը։
«Եթե մեր դիվանագետներին արտաքսելու պրակտիկան շարունակվի, դիվանագիտական հարաբերությունների խզման ռիսկ կա, քանի որ մենք ամեն օր ենք բախվում նման թշնամական գործողությունների։ Դիվանագետների արտաքսումը փակում է դիվանագիտական հարաբերությունների պատուհանը»,– ֆրանսիական LCI հեռուստաալիքին տված հարցազրույցում ասել Է Պեսկովը։
Միաժամանակ նա ընդգծել է, որ դիվանագիտական հարաբերությունները պետք է պահպանել, հատկապես` ներկայիս պայմաններում:
Ուկրաինայում ռազմական գործողության մեկնարկից հետո Արևմուտքի երկրները սկսել են արտաքսել ռուսաստանցի դիվանագետներին։ Ըստ ՌԻԱ Նովոստիի հաշվարկների՝ մեկ ամսում մոտ 300 մարդ է արտաքսվել, և այդ թիվը կավելանա, քանի որ առայժմ ոչ բոլոր երկրներն են հրապարակել արտաքսվող ռուսաստանցիների թիվը:
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 42–րդ օրը։