ԵՐԵՎԱՆ, 6 ապրիլի - Sputnik. Քարդաշյան հայտնի քույրերից ավագը` 42-ամյա Քորթնին, ամուսնացել է Blink-182 խմբի թմբկահար Թրևիս Բարքերի հետ։
Ինչպես հայտնում է TMZ-ը` Քորթնիի և Թրևիսի ամուսնության գաղտնի արարողությունն անցկացվել է Լաս Վեգասի մատուռներից մեկում, ապրիլի 3-ի լույս 4-ի գիշերը, «Գրեմմիի» մրցանակաբաշխությունից անմիջապես հետո, այդ պատճառով էլ հարսն ու փեսան արարողությանը ներկայացել են կեսգիշերն անց։
Համացանցում տեսանյութ է հայտնվել, որում նորապսակները մատուռից հյուրանոց են վերադառնում։ Տեսանյութից դատելով` հարսը գինովցած է, նա անընդհատ սայթաքում է, իսկ Թրևիսն օգնում է նրան։ Հատկանշական է, որ զույգը որևէ մեկին թույլ չի տվել լուսանկարել հարսանեկան արարողությունը։ Հանդիսավոր պահն արձանագրելու համար նրանք անձնական լուսանկարիչ են հրավիրել։
Մոդելի և թմբկահարի երկրպագուներն ակտիվորեն քննարկել են նրանց հարսանիքի մասին նորությունը։
Մասնավորապես, The Sun–ը գրում է, որ համացանցի օգտատերերը քննադատել են զույգին, քանի որ կարծում են, որ ամուսնությունը կեղծ է։ Ոմանք էլ ենթադրել են, թե աստղերը համեստ արարողություն են կազմակերպել The Kardashians շոուի վարկանիշի համար, հետո էլ կկայանա «իրական հարսանիքը»։
Այս տեղեկությունն ավելի ուշ հաստատվեց. արևմտյան լրագրողները պարզեցին, որ իրականում հայտնիների ամուսնությունն օրինական չէ։ Լուրեր են հայտնվել, թե Քարդաշյանն ու Բարքերը մատուռի տիրոջն ամուսնության պատրաստի վկայական են ներկայացրել։ Սակայն շուտով թղթակիցների հետ զրույցում աշխատակիցները հերքել են այդ տեղեկությունը` նշելով, որ Քորթնին և Թրևիսը պաշտոնապես այդպես էլ ամուսիններ չեն դարձել։
Որևէ մեկնաբանություն զույգը դեռ չի տվել։ Բայց ոչ ոք չի կասկածում, որ առաջիկայում նրանք կհրապարակեն մատուռում արված կադրերը։
Քորթնի Քարդաշյանի համար սա առաջին պաշտոնական ամուսնությունը կլինի։ Մինչ այդ նա հարաբերություններ է ունեցել Սքոթ Դիսիկի հետ։ Զույգը երեք երեխա ունի, բայց նրանք այդպես էլ չեն ամուսնացել։
Blink-182 ռոք խմբի թմբկահար Թրևիս Բարքերի հետ մոդելը նշանվել է նախորդ տարվա հոկտեմբերին։ Բարքերի համար սա երրորդ ամուսնությունն է։ Նախորդ կանանցից նա երեխաներ չունի։