ԵՐԵՎԱՆ, 6 ապրիլի - Sputnik. Կիևը Թբիլիսիից պաշտոնական ապացույցներ է պահանջում, որոնք ցույց կտան, որ իրենց երկիրը ՌԴ-ին չի օգնում շրջանցել պատժամիջոցները։ Նման հայտարարությամբ միասնական հեռուստամարաթոնի ժամանակ հանդես է եկել Ուկրաինայի ԱԳ նախարար Դմիտրի Կուլեբան, հաղորդում Է Liga.net պորտալը։
«Մենք պաշտոնական ապացույցներ և համոզիչ փաստարկներ ենք սպասում Վրաստանից, որոնք ցույց կտան, որ նրանք դա չեն անում։ Եթե այդ ապացույցներն ու փաստարկները բավարար չափով համոզիչ չլինեն, մենք կորոշենք, թե ինչ գործողություններ ձեռնարկենք»,- հայտարարել է Կուլեբան։
Նա հավելել է, որ եթե Ուկրաինան և նրա դաշնակիցները չազդեին Վրաստանի վրա, ապա ռուսաստանցիներն արդեն ելքեր գտած կլինեին այդ երկրի տարածքով պատժամիջոցները շրջանցելու համար:
Ուկրաինայի հետախուզության գլխավոր վարչությունից հայտարարել են, որ տեղեկություններ ունեն այն մասին, թե ռուսները պատժամիջոցները շրջանցելու համար Վրաստանի տարածքով մաքսանենգության ուղիներ են հարթում։ Ընդ որում, Վրաստանի հատուկ ծառայությունները, ըստ այդ տեղեկությունների, քաղաքական ղեկավարությունից հրահանգ են ստացել չխոչընդոտել մաքսանենգների գործունեությանը:
Պաշտոնական Թբիլիսին կտրականապես հերքում է ուկրաինական կողմի մեղադրանքները և պահանջում ապացույցներ ներկայացնել մաքսանենգ ապրանքների տեղափոխման վերաբերյալ: