ԵՐԵՎԱՆ, 7 ապրիլի – Sputnik. ԱՄՆ-ն լիովին արգելափակել է ռուսական բանկային հատվածի ավելի քան 2/3-ը և արգելել է նոր ներդրումներ անել Ռուսաստանի տնտեսության մեջ։ Այս հայտարարությունն արել է ԱՄՆ վարչակազմի բարձրաստիճան ներկայացուցիչը:
Նա նշել է, որ արևմտյան պատժամիջոցների արդյունքում ռուսական տնտեսությունը կդադարի մտնել խոշորագույն քսանյակի մեջ:
«Միայն այս տարի, ԱՄՀ կանխատեսումների համաձայն, տնտեսական ցնցումն ի չիք կդարձնի վերջին 15 տարվա ձեռքբերումները։ Նախկինում Ռուսաստանը աշխարհի 11-րդ խոշորագույն տնտեսությունն էր։ Հիմա շատ հավանական է, որ դուրս գա քսանյակից», - ասել է պաշտոնյան։
Միաժամանակ ԱՄՆ-ն կարող է ուժեղացնել կամ թուլացնել Ռուսաստանի դեմ պատժամիջոցները։
«Դրանք այնպես են մշակված, որ բավական ճկուն լինեն։ Մենք կարող ենք ուժեղացնել և թուլացնել պատժամիջոցները՝ կախված հանգամանքներից», - հայտարարել Է Սպիտակ տան վարչակազմի բարձրաստիճան ներկայացուցիչը։
Պաշտոնյայի խոսքով` ԱՄՆ-ն մերժում է այն կապիտալը, տեխնոլոգիաները, տաղանդները, որոնք կարող էին մուտք գործել Ռուսաստան։
Բացի այդ, Վաշինգտոնը պատժամիջոցներ է սահմանել Վլադիմիր Պուտինի դուստրերի, Սերգեյ Լավրովի կնոջ և դստեր, ինչպես նաև Ռուսաստանի Անվտանգության խորհրդի մի շարք անդամների նկատմամբ:
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 42–րդ օրը։