ԵՐԵՎԱՆ, 5 ապրիլի — Sputnik. Եվրամիությունը մտադիր է արգելել 10 մլրդ եվրոյի կիսահաղորդիչների, մեքենաների, տրանսպորտային սարքավորումների մատակարարումները Ռուսաստան։ Տեղեկությունը հայտնել է Եվրոպական հանձնաժողովի ղեկավար Ուրսուլա ֆոն դեր Լյայենը:
«ԵՄ-ի նոր պատժամիջոցները ենթադրում են կարևորագույն ոլորտներում 10 մլրդ եվրոյի արտահանման հետագա արգելքներ՝ առաջադեմ կիսահաղորդիչներ, մեքենաներ ու տրանսպորտային սարքավորումներ», - ասել է նա:
Ֆոն դեր Լյայենի խոսքով՝ Եվրամիությունը նպատակաուղղված միջոցներ կձեռնարկի ԵՄ-ում պետական գնումներում ռուսական ընկերությունների արգելման ու ցանկացած ֆինանսական աջակցություն բացառելու ուղղությամբ «ինչպես եվրոպական, այնպես էլ ազգային՝ ռուսական պետական մարմինների համար»:
Ֆոն դեր Լյայենը նաև հայտնել է, որ ԵՄ-ն մտադիր է արգելել ռուսական նավերի մուտքը Եվրամիության նավահանգիստներ:
Եվրամիությունն ուզում է արգելել ռուսական ածուխի ներմուծումը, նաև քննարկվում է Ռուսաստան նոր տեխնիկայի արտահանման արգելափակումն ու բեռնատար ավտոմեքենաների և նավերի մուտքը ԵՄ: Բացի այդ, կարող են պատժամիջոցներ սահմանվել «ռուս օլիգարխների» ու նրանց ընտանիքների որոշ անդամների նկատմամբ։
Արգելվելու է նաև Ռուսաստանից փայտանյութի, ցեմենտի, կաուչուկի, քիմիկատների, «էլիտար սննդի» (ներառյալ՝ ձկնկիթը) ու սպիրտային խմիչքների, այդ թվում՝ օղու ներմուծումը:
Բացի այդ, ԵՄ-ն մտադիր է արգելափակել բոլոր գործարքները ՎՏԲ բանկի ու երեք այլ ռուսական բանկերի հետ: Reuters-ը գրում է, որ դրանց անվանումները չեն նշվում, սակայն հստակեցվում է, որ դրանք արդեն հանվել են SWIFT միջազգային համակարգից։ Այս ամենով հանդերձ, ԵՄ-ն դեռ չի պատրաստվում արգելել ռուսական նավթի կամ գազի մատակարարումը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ-ը, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 41–րդ օրը։