ԵՐԵՎԱՆ, 4 ապրիլի – Sputnik. Ռուսաստանը պնդելու է, որպեսզի Բուչայի իրադարձությունների (որոնք ՌԴ ՊՆ-ն սադրանք է անվանել) շուրջ ՄԱԿ-ի Անվտանգության խորհրդի նիստը տեղի ունենա այսօր։ Այդ մասին իր Telegram ալիքում հայտնել է ՄԱԿ-ում Ռուսաստանի մշտական ներկայացուցչի առաջին տեղակալ Դմիտրի Պոլյանսկին։
«Ինչպես հասկանում ենք` մեր բրիտանացի գործընկերների առաջին խնդիրն է ընթացակարգային պատրվակների մեջ տարրալուծել Ուկրաինայի թեմայով մեկ ուրիշ, ավելի լայն թեմաներով նիստի մեջ, որը նախատեսվում է երեքշաբթի օրը (վաղը` ապրիլի 5–ին,–խմբ.)։ նրանք ակնհայտորեն չեն ուզում, որ մենք առանձին բարձրացնենք այդ հարցը, ինչը վնաս կհասցնի արևմտյան երկրների հեղինակությանը, որոնք արդեն Ռուսաստանին են մեղադրել Բուչայում խաղաղ բնակիչների սպանության համար։ Դա չի աշխատի. աշխարհը պետք է իմանա ճշմարտությունը։ Մենք պնդելու ենք, որպեսզի նիստը կայանա այսօր, ինչպես խնդրել ենք»,-ընդգծել է Պոլյանսկին։
Հիշեցնենք` Ուկրաինայի իշխանություններն ու ԶԼՄ–ները տեսագրություն էին տարածել, որն իբր նկարահանվել է Կիևի մարզի Բուչա քաղաքում։ Կադրերում երևում է, որ ճանապարհին մարմիններ են ընկած։ Օգտատերերը ուշադրություն են դարձրել, որ «դիերը» շարժում են ձեռքերն ու թաքցնում վերջույթները ռազմական տեխնիկայի անիվների տակ չմնալու համար։ Օպերատորի մեքենայի հայելում կարելի է նկատել, թե ինչպես է «զոհվածներից» մեկը վեր կենում, երբ մեքենան անցնում է։
Կիևը խաղաղ բնակիչների մահվան մեջ մեղադրում է ռուս զինվորականներին։ ԵՄ - ն սպառնում է նոր պատժամիջոցներով։
ՌԴ ՊՆ-ն հայտարարել է, որ բոլոր լուսանկարներն ու տեսանյութերը ուկրաինական իշխանությունների սադրանքն են: Ինչպես նշել են ռազմական գերատեսչությունում, այն ժամանակ, երբ քաղաքը եղել է ՌԴ զինված ուժերի վերահսկողության տակ, տեղի բնակիչներից ոչ մեկը չի տուժել բռնի գործողություններից: Նախարարությունում նշել են, որ ՌԴ բոլոր ստորաբաժանումները Բուչայից դուրս են եկել դեռևս մարտի 30-ին ՝ Ստամբուլում ռուս-ուկրաինական բանակցությունների հաջորդ օրը: