ԵՐԵՎԱՆ, 4 ապրիլի– Sputnik. Անցած օրվա ընթացքում Ռուսաստանի օդատիեզերական ուժերի ավիացիայի միջոցով խոցվել է Ուկրաինայի 17 ռազմական օբյեկտ, այդ թվում` 2 հրամանատարական կետ և կապի հանգույցներ, զինամթերքի 2 պահեստ ու վառելիքի պահեստարան, ինչպես նաև 11 հենակետ և ուկրաինական զորքերի կենտրոնացման շրջաններ։ Տեղեկությունը հայտնել է ՌԴ ՊՆ պաշտոնական ներկայացուցիչ գեներալ–մայոր Իգոր Կոնաշենկովը։
«Հատուկ ռազմական գործողության մեկնարկից ի վեր ընդհանուր առմամբ ոչնչացվել է 125 ինքնաթիռ, 91 ուղղաթիռ, 394 անօդաչու թռչող սարք, 226 զենիթահրթիռային համալիր, 1948 տանկ և այլ մարտական զրահապատ մեքենաներ, համազարկային կրակի ռեակտիվ համակարգերի 212 սարք, դաշտային հրետանու և ականանետերի 838 հրանոթ, ինչպես նաև 1842 միավոր հատուկ ռազմական ավտոմոբիլային տեխնիկա»,- ասել է Կոնաշենկովը:
Լուգանսկի Ժողովրդական Հանրապետության ազգային միլիցիայի ստորաբաժանումները 2 կմ առաջխաղացում են ունեցել և արգելափակել են 3 բնակավայր։
«ՌԴ հակաօդային պաշտպանության միջոցներով Սևերոդոնեցկ բնակավայրի մոտ օդում 2 անօդաչու թռչող սարք է խոցվել»,– նշել է ՊՆ ներկայացուցիչը։
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից ի վեր, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ը, Եվրամիությունն ու Արևմուտքի շատ երկրներ սկսեցին պատժամիջոցներ սահմանել Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 40–րդ օրը։