ԵՐԵՎԱՆ, 4 ապրիլի – Sputnik. Արցախում ու Հայաստանի սահմաններին պահպանվող լարվածության միտումը մտահոգության տեղիք է տալիս։ Այսօր ԱԺ–ում լրագրողների հետ ճեպազրույցում այս մասին ասաց ՀՀ պաշտպանության փոխնախարար Արման Սարգսյանը` մեկնաբանելով ռազմական լայնածավալ գործողությունների վտանգի մասին` ՀՀ վարչապետի մարտի 31-ի հայտարարությունը։
«Այս պահին իրավիճակը շարունակում է մնալ կայուն լարված. Արցախա– ադրբեջանական շփման գծում, մասնավորապես Փառուխում, ընդհանուր առմամբ իրավիճակը շարունակում է մնալ նույնը։ Այսինքն, ինչ տեղեկատվություն որ տրամադրվել է, որևէ փոփոխության չի ենթարկվել: Հրաձգություն, մեծ բախումներ այս պահին չկան»,– ասաց Սարգսյանը։
Հնարավոր լարման մասին հարցին պաշտպանության փոխնախարարը պատասխանեց, որ երբևէ չի բացառել հնարավոր էսկալացիան, քանի որ, նրա խոսքով` մեր խաղաղությունը փխրուն է։
«Եվ այս պահին աշխարհում տեղի ունեցող իրադարձություններով պայմանավորված` չի բացառվում, որ որևէ մեկը, որևէ պետություն, փորձի ապակայունացնել վիճակն ու իր շահերն առաջ տանել»,– ասաց Սարգսյանը։
Հիշեցնենք` Ադրբեջանի զինված ուժերը մարտի 24-ին` ժամը 16։00-ին, ԼՂ Ասկերանի շրջանի Փառուխ գյուղի ուղղությամբ խախտել էին շփման գիծը ու առաջ շարժվել Քարագլխի դիրքերի ուղղությամբ։
Մարտի 25–ի գիշերը նրանք կրակ էին բացել ՊԲ ստորաբաժանումների վրա, արդյունքում հայկական կողմից վիրավորում են ստացել 5 պայմանագրային զինծառայողներ։
Մարտի 25-ի կեսօրից Ադրբեջանի ԶՈւ ստորաբաժանումները, բացի հրաձգային զինատեսակներից, կիրառել էին նաև հարվածային անօդաչու թռչող սարքեր, այդ թվում` «Bayraktar TB-2»: Հայկական կողմից զոհվել են ՊԲ 3 պայմանագրային զինծառայող, վիրավորները 14-ն են:
Իրավիճակի սրացման պատճառով Խրամորթից տարհանվել են երեխաներն ու կանայք։
Մարտի 29-ին ադրբեջանցիները հեռացել են Փարուխից ու այնտեղ ռուս խաղաղապահներ են տեղակայվել, բայց նրանք շարունակում են մնալ Քարագլխի դիրքերի մի հատվածում։
Արցախի իշխանություններն ու խաղաղապահները բանակցություններ են վարում ադրբեջանցիներին այդտեղից հեռացնելու նպատակով։