ԵՐԵՎԱՆ, 4 ապրիլի – Sputnik, Արմենուհի Մխոյան. Վերջին շրջանում կասկածելի հղումներով գրություններ են հայտնվել Գյումրիում:
Քաղաքի կենտրոնական հատվածներում` տարբեր շինությունների վրա Տելեգրամ-ալիքների հասցեներ են գրվում` մեծ ու գունավոր գրություններով։ Ամենայն հավանականությամբ, դրանց միջոցով օնլայն տարբերակով թմրամիջոցների վաճառք է իրականացվում։ Խնդրով սկսել է զբաղվել նաև Շիրակի մարզի դատախազությունը։
Այդ գրառումները քաղաքում առաջինը նկատած Գոռ Թորոսյանը դրանց մասին ահազանգել է Գյումրու քաղաքապետարանին: Sputnik Արմենիայի հետ զրույցի ժամանակ Գոռը տեղեկացրեց, որ միայն ինքը չի տեսել դրանք, իր ընկերները ևս քաղաքի տարբեր հատվածներից իրեն նման գրություններով լուսանկարներ են ուղարկել: Երիտասարդը պարզել է, որ հենց նույն հղումներով գրություններ դեռ անցած տարի հայտնվել էին ՌԴ որոշ քաղաքներում, որոնք շատ արագ մաքրվել են: «Մեր ահազանգից հետո մի մասը մաքրվեց, սակայն մինչ օրս դեռ կան գրություններ, որոնք նաև քաղաքի բանուկ հատվածներում են»,-նշեց Գոռը:
Խնդիրը մտահոգիչ է համարում նաև Շիրակի մարզի դատախազ Գուրգեն Գրիգորյանը: Sputnik Արմենիայի հետ զրույցում, անդրադառնալով վերջերս Գյումրիում շինությունների վրա հայտնված գրառումներին, նա նշեց, որ այդ փաստով նյութեր են նախապատրաստվում:
«Կատարվել են դեպքի վայրերի զննություններ: Ձեռնարկվում են օպերատիվ- հետախուզական միջոցառումներ՝ գրող անձի կամ անձանց ինքնությունը պարզելու, նրանց հայտնաբերելու, ինչպես նաև ենթադրաբար այդ կայքերի իսկությունը, հասանելիությունը պարզելու ուղղությամբ»,- նշեց ՇՄ դատախազը:
Պատասխանատուն նաև հայտնեց, որ ձեռնարկված միջոցառումների շնորհիվ արդյունքներ արդեն ունեն՝ հայտնաբերվել են անձինք, ովքեր այդ ալիքներով ձեռք են բերել թմրամիջոցներ, կան մեղադրյալներ, դատարան ուղարկված գործեր: Այս պահին այդ գործերով անչափահասներ, բարեբախտաբար, չկան:
Նա տեղեկացրեց, որ իրենց կողմից հանձնարարվել է, որ միջոցներ ձեռնարկվեն գրություններն ամբողջովին մաքրելու համար։ Ի դեպ, մարզում նման գրառումների մասին ահազանգ այս պահին միայն Գյումրիից են ստացել: