ԵՐԵՎԱՆ, 4 ապրիլի – Sputnik. Հայ ինժեներների կողմից ստեղծված նոր դետեկտորը ճանաչում է ռադիոազդանշանները` մնալով անտեսանելի։
Ինչպես Sputnik Արմենիայի հետ զրույցում հայտնեց Advanced Technologies Group ընկերության գլխավոր ինժեներ Սուրեն Էյրամջյանը` համակարգը թույլ է տալիս վերահսկել ռադիոհաճախականության ողջ տիրույթը, որից հետո այնտեղից կարելի է առանձնացնել և վերլուծել «անհրաժեշտ» ազդանշանները։ Դետեկտորի գործողության շառավիղը կախված է ինչպես դիտարկվող օբյեկտների հեռահարությունից, այնպես էլ դրանց ազդանշանների հզորությունից։
Սուրեն Էյրամջյան
© Sputnik / Aram Nersesyan
Դետեկտորների օգնությամբ հնարավոր է որոշել նաև օբյեկտների գտնվելու վայրը. եթե մի քանի սարք միաժամանակ որսում են ազդանշանի ուղղությունը, ապա օբյեկտը կգտնվի դրանց հատման կետում։
Սարքի գործողության տիրույթում են նաև մի քանի գերբարձր հաճախականություններ, որոնց վրա կարող են գործել հակառակորդի անօդաչուները։
Ընդ որում, դետեկտորը ռադիոալիքներ չի արձակում, այդ պատճառով այն անհնար է որսալը. այն միայն «լսում» է մյուսների ալիքները, իսկ անձամբ խորը «ռադիոլռության» մեջ է գտնվում։
«Նախկինում մեր երկրում նման համակարգեր մշակվել են, սակայն մենք սպեցիֆիկ լուծումների գնացինք, որոնք լուրջ մրցակցային առավելություն են տալիս», – հավելեց Էյրամջյանը։
Դետեկտորները կարող են լինել ինչպես ստացիոնար, այնպես էլ շարժական. վերջինները հնարավոր է օգտագործել տեղանքում տվյալների ճշգրտման համար։
ArmHighTech ցուցահանդեսն անցկացվել է մարտի 31-ից ապրիլի 2-ը, ցուցահանդեսին ներկայացված էին ինչպես հայրենական, այնպես էլ արտասահմանյան մշակումներ։