Արցախի փրկության պահանջն է. «5165 շարժման» անդամները պահանջագիր ներկայացրին ԱԺ–ին

ԵՐԵՎԱՆ, 4 ապրիլի – Sputnik. «5165 շարժման» ներկայացուցիչներն այսօր ԱԺ–ի պատգամավորներին պահանջագիր ներկայացրին` պահանջելով օրենսդիրից ճանաչել Արցախի անկախությունը և անհապաղ աշխատանքներ սկսել նրա միջազգային ճանաչման ուղղությամբ։

ԱԺ շենքի մոտ լրագրողների հետ զրույցում այս մասին ասաց շարժման խորհրդի անդամ Մենուա Սողոմոնյանը` ներկայացնելով նամակի բովանդակությունը։

«Սա Արցախի փրկության պահանջն է։ Բոլորդ գիտեք, թե ինչ իրավիճակ է` թշնամին մաս առ մաս գրավում է Արցախը` հայկական բնակավայրերը, ռազմավարական նշանակության բարձունքները, որտեղից, կարելի է ասել, վերահսկում է ամբողջ Արցախը։ Ներկայիս իշխանությունը պետք է դուրս շպրտեր թշնամուն, իսկ երկրորդ հերթին` պետք է Ադրբեջանին ստիպեր գալ կարգավորման դաշտ, սակայն նրանք չեն անում ոչ մեկը, ոչ էլ մյուսը»,– ասաց Սողոմոնյանը։

Նրա խոսքով` ՀՀ կառավարությունը ԼՂ հակամարտության գործընթացի երաշխավորներից` ԵԱՀԿ Մինսկի խմբի համանախագահող երկրներից, գործուն և արդյունավետ մեխանիզմներով պետք է պահանջի Ադրբեջանից բերել կարգավորման դաշտ։

Սողոմոնյանը Արցախում տեղի ունեցող իրադարձությունները` գազամատակարարման անջատումը, բնակավայրերի վրա հարձակումը, ժողովրդին ահաբեկումը, համեմատեց ցեղասպանության հետ։ Շարժման ներկայացուցիչը շեշտեց` նման գործողություններով փորձում են հարկադրել այնտեղի ժողովրդին լքել իրենց բնակավայրերը ու հայաթափել Արցախը։

Շարժման առաջնորդ Կարին Տոնոյանը, դիմելով բոլոր քաղաքական ուժերին, ասաց, որ Արցախի ճանաչումը պետք է դառնա բոլորի օրակարգի հարցը։

«Դիմում եմ մեր պատգամավորներին և իշխանությանը, եթե փորձեք մոլորեցնել ժողովրդին, թե ճանաչվելով Արցախի անկախությունը` պատերազմ կսկսվի, ապա մենք ձեզ կմեղադրենք Ադրբեջանի հետ պայմանավորվածություններ ունենալու մեջ, որպեսզի հարկադրեք ժողովրդին վախի ազդեցության տակ հրաժարվել Արցախից։ 30 տարի հայ զավակների արյունն է հոսել հանուն Արցախի, և այսօր դա դավաճանություն է սեփական զավակների նկատմամբ»,– ասաց Տոնոյանը։

Նա նշեց, որ իրենք հետևողական են լինելու, որպեսզի հարցը մեծ հնչեղություն ստանա, ու ժողովուրդն էլ միանա տվյալ պահանջին։

Շարժման ներկայացուցիչները ձեռքերին պահել էին Արցախի դրոշը, ինչպես նաև «Այսօր` Արցախը, վաղը` Զանգեզուրը, մյուսը` Երևանը», «Ճանաչենք Արցախը» գրառմամբ պաստառներ։

Ապրիլի 6-ին, երբ Բրյուսելում Եվրոպական խորհրդի նախագահ Շարլ Միշելի նախաձեռնությամբ տեղի կունենա ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը, դրան զուգահեռ «5165 շարժման» ներկայացուցիչները պատրաստվում են վաղ առավոտից` ժամը 10։00-ից բողոքի գործողություններ սկսել Հանրապետության հրապարակում, ինչպես նաև նստացույց անցկացնել, որպեսզի փորձեն կասեցնել հնարավոր որևէ փաստաթղթի ստորագրումը։