ԵՐԵՎԱՆ, 4 ապրիլի - Sputnik. Պաշտպանական անօդաչու սարքերի մշակող Donavia ընկերությունը Երևանում ArmHighTech պաշտպանական տեխնոլոգիաների ցուցահանդեսում անօդաչու սարքերի նոր մոդելներ է ներկայացրել։
Ցուցահանդեսի ժամանակ ընկերությունը ներկայացրել է ինքնաթիռի տիպի անօդաչու թռչող սարքեր՝ կատապուլտային թռիչքով ու պարաշյուտային վայրէջքով: Հայկական աշխարհագրական պայմանների համար սա ամենաարդյունավետ լուծումն է։ Sputnik Արմենիայի հետ զրույցում նման կարծիք է հայտնել ընկերության ավագ ինժեներ Արման Խաչատրյանը։
Ընկերությունը ստեղծել է բենզինով և էլեկտրական շարժիչներով մոդելներ։ Յուրաքանչյուրն իր առավելություններն ունի: Առաջինը հնարավորություն է տալիս համեմատաբար երկար թռչել, երկրորդը շատ ավելի լուռ է աշխատում։
«Բացի այդ, մենք օգտագործում ենք ինժեկտորային շարժիչ, որը թույլ է տալիս բավականին մեծ բարձրություն հավաքել։ Իսկ տեսախցիկները, որոնք դնում ենք մեր մոդելների վրա, թույլ են տալիս հակառակորդի տեխնիկան ֆիքսել մինչև մի քանի կիլոմետր հեռավորության վրա, իսկ այնուհետև՝ առցանց ռեժիմով փոխանցել անշարժ ու շարժական թիրախների կոորդինատները»,- նշեց Խաչատրյանը։
Старший инженер компании Danavia Арман Хачатрян на выставке оборонных технологий ArmHighTech 2022 (31 марта 2022). Еревaн
© Sputnik / Aram Nersesyan
Նա ավելացրեց, որ ներկայացված բոլոր մոդելներն արդեն փորձարկվել են ու թռիչքներ են իրականացրել:
Նշենք, որ մարտի 31-ից ապրիլի 2-ը Երևանում անցկացվել է ArmHighTech պաշտպանական տեխնոլոգիաների ցուցահանդեսը, որտեղ ներկայացված են ինչպես հայկական, այնպես էլ արտասահմանյան մշակումները: