ԵՐԵՎԱՆ, 3 ապրիլի – Sputnik. Ոչ բարեկամական երկրներ մատակարարվող գազի դիմաց ռուբլով վճարելու որոշումն ընդունվել էր, որպեսզի Ռուսաստանից պատժամիջոցների պատճառով չխլեն գազի համար վճարած դոլարներն ու եվրոները։ Այս մասին «Ռոսիա 1» հեռուստաալիքի եթերում հայտնել է ՌԴ նախագահի մամուլի քարտուղար Դմիտրի Պեսկովը։
Նրա խոսքով` այս որոշումն ընդունվել է ոչ թե որևէ մեկի քթին հարվածելու համար, այլ ռուսական առևտուրն ապահովելու համար, որպեսզի Ռուսաստանից չխլեն գազի դիմաց վճարած դոլարներն ու եվրոները։
«Ի՞նչ է պատահել։ Մենք պատժամիջոցային զվարճանքի այնպիսի խելահեղություն ենք տեսնում. պատմության մեջ ամենամեծ պատժամիջոցային բեռն այսօր ընկել է հենց ՌԴ–ի ուսերին։ Բացի այդ էլ, ինչպես գիտեք, կալանք է դրվել այլ երկրներում գտնվող մեր արժութային պահուստների վրա», – ասել է Պեսկովը։
ՌԴ նախագահի մամուլի քարտուղարի խոսքով` Ռուսաստանը բացարձակ որևէ մեկին չի սպառնում, սակայն թշնամական միջավայրի պայմաններում պարտավոր է փոխհատուցել ռիսկերը։
Պեսկովն ընդգծել է, որ ռուսական կողմը հույսը դրել է իրենից գազ ձեռք բերող պայմանադիր կողմի ողջամտության վրա։
«Պատժամիջոցային այս խրախճանքը տեղի է ունենում եվրոպացիների հաշվին։ Եվ որպես կանոն, այս ամենի համար Վաշինգտոնից են հաշիվ ներկայացնում։ Այդ իսկ պատճառով առնվազն անտրամաբանական կլիներ, ռուսերեն ասած, անխելքություն կլիներ ելնել խաբուսիկ քաղաքական շահերից և կանգնել սեփական տնտեսության կոկորդին։ Այնուամենայնիվ լավագույն հանգուցալուծման հույս ունենք։ Հույսներս դնում ենք մեզնից գազ գնող պայմանադրային կողմի ողջամտության վրա», – ասել է Պեսկովը` պատասխանելով այն հարցին, թե հնարավոր է արդյոք Արևմուտքի համար գազն անջատվի, եթե այն հրաժարվի վճարել դրա դիմաց ռուբլով։
Պեսկովը նշել է, որ Ռուսաստանն իրենից գազ գնող արևմտյան գործընկերների կյանքը բարդացնել չի ցանկանում, նա թանկ է գնահատում սեփական համբավը։
«Ռուսաստանը գնահատում է հուսալի մատակարարի իր հեղինակությունը։ Իհարկե, մենք չենք անի որևէ քայլ, որը կխաթարի այդ համբավը։ Այդ իսկ պատճառով ամեն ինչ կլինի արագ, հստակ և հասկանալի։ Բայց դա պետք է անել։ Թեև կրկնում եմ, եվրոպական ընկերությունների համար, դե–ֆակտո, ոչինչ չի փոխվի։ Դե–յուրե դա արդեն բոլորովին այլ համակարգ կլինի», – ասել է Պեսկովը։
Հիշեցնենք` ՌԴ նախագահ Վլադիմիր Պուտինը հայտարարել է, որ Ռուսաստանը ռուբլով է կատարելու ոչ բարեկամական երկրներին գազ մատակարարելու հաշվարկները: Նա ԿԲ-ին և կառավարությանը հանձնարարել է մեկշաբաթյա ժամկետում հստակեցնել Եվրոպայի հետ ռուբլով գործարքներ իրականացնելու կարգը։
Միևնույն ժամանակ նա հայտարարել է, որ Ռուսաստանը կշարունակի գազ մատակարարել այն ծավալներով և գներով, որոնք արձանագրված են ավելի վաղ կնքված պայմանագրերում, քանի որ երկրի համար կարևոր է սեփական հեղինակությունը: