ԵՐԵՎԱՆ, 2 ապրիլի – Sputnik, Դավիթ Գալստյան. Հրազդան-Իջևան-Ղազախ երկաթուղու հայկական հատվածի վերականգնման արժեքը գնահատվում է մոտ 500 մլն դոլար, Sputnik Արմենիայի հարցմանն ի պատասխան հայտնել են տարածքային կառավարման և ենթակառուցվածքների նախարարությունից:
«Իջևան-Ղազախ երկաթուղու վերաբերյալ տեղեկացնում ենք, որ քննարկվել են ապաշրջափակման բոլոր հնարավոր ուղղությունները, այդ թվում նաև Ձեր կողմից նշված ուղղությունը։ Նախնական փուլում պայմանավորվածություն է ձեռք բերվել վերականագնել Երասխ-Ջուլֆա-Օրդուբադ-Մեղրի-Հորադիզ երկաթուղային հատվածը»,-ասված է հաղորդագրության մեջ:
Մեզ հայտնեցին նաև, որ Հրազդան-Դիլիջան-Իջևան-Ադրբեջանի սահման հատվածի վերականգնման նախնական արժեքը գնահատվում է 496 մլն դոլար:
Հարցին՝ քննարկվում է արդյոք ավտոճանապարհային հաղորդակցության վերականգնման հարցը, նախարարությունից պատասխանեցին, որ քննարկվել են բոլոր տարբերակները: Այս պահին այդ հարցի շուրջ քննարկումներ չեն ընթանում։
Ուղիղ մեկ տարի առաջ փոխվարչապետ Մհեր Գրիգորյանը հայտարարել էր, որ Հայաստանն ու Ադրբեջանը ՌԴ միջնորդությամբ քննարկում են խորհրդային ժամանակներում գոյություն ունեցած բոլոր կոմունիկացիաների ապաշրջափակման հարցը:
Մի քանի օր անց Sputnik Արմենիային տված հարցազրույցում Տավուշի այն ժամանակվա մարզպետ Հայկ Չոբանյանը հաստատել էր, որ աշխատանքային քննարկումներ են ընթանում Տավուշով Ադրբեջանի հետ երկաթուղային հաղորդակցության բացման շուրջ։
Սակայն ավելի ուշ Հայաստանի և Ադրբեջանի միջև ճանապարհների ապաշրջափակման շուրջ քննարկումների օրակարգում մնաց միայն Սյունիքի մարզով անցնող հատվածի հարցը։
Նշենք, որ Հայաստանի և Ադրբեջանի միջև երկաթուղու մեկ այլ հատվածի (Երասխ-Ջուլֆա (Ջուղա)-Օրդուբադ-Մեղրի-Հորադիզ) վերականգնման արժեքը, ինչպես Sputnik Արմենիային հայտնեցին նախարարությունում, կազմում է 226 մլն դոլար: Վերականգնման մասին որոշումն արդեն ընդունվել է:
Ավելի վաղ գրել էինք, որ Գյումրի-Կարս երկաթգծի՝ Հայաստանի տարածքում գտնվող հատվածի վերանորոգման արժեքը գնահատվում է մոտ 17 մլն ԱՄՆ դոլար։
Հետևեք մեր թղթակցի գրառումներին հեղինակային Telegram-ալիքում՝ https://t.me/Arm_Aeternum7