ԵՐԵՎԱՆ, 1 ապրիլի – Sputnik. «Հայաստան» խմբակցության պատգամավորներ Արթուր Ղազինյանն ու Արթուր Սարգսյանն ԱԺ-ում շրջանառության մեջ են դրել օրենսդրական նախագծերի փաթեթ, որով նախատեսվում է թույլատրել ծխախոտի կամ դրա փոխարինիչի օգտագործումը որոշ վայրերում։ Ղազինյանն իր ֆեյսբուքյան էջում գրառում է արել` հայտնելով այդ մասին։
Նախ նա նշել է, որ ծխելը վատ բան է, և ինքը բոլորին խորհուրդ է տալիս չծխել, սակայն նշել է, որ իշխանությունների կողմից հակածխախոտային քաղաքականությունը հատել է խելամտության ու բանականության բոլոր սահմանները, քանի որ արգելվել են ծխախոտի, սիգարների, նարգիլեների և դրանց փոխարինիչների օգագործումը հանրային սննդի սպասարկման բոլոր վայրերում:
Ըստ այդմ, պատգամավորներն առաջարկում են թույլատրել ծխելը բաթօթյա հանրային սննդի օբյեկտներում, ծխախոտի օգտագործման մասնագիտացված օբյեկտներում (սիգար, նարգիլե, կալյան ակումբեր)։ Բացի այդ, առաջարկում են ծխելը թույլատրել հանրային սննդի այնպիսի օբյեկտներում, որոնք ունեն դրա օգտագործման համար առանձնացված և առողջապահության բնագավառի պետական լիազոր մարմնի կողմից սահմանված տեխնիկական պահանջներին համապատասխանող հատուկ տարածքներ:
«Հռոմի պապից ավելի կաթոլիկ երևալու` այս իշխանության վարքագիծը արդեն իսկ առաջացրել է լուրջ դժգոհություններ ինչպես հանրային սննդի կազմակերպիչների, տնտեսվարողների, այնպես էլ հարյուր հազարավոր մեր քաղաքացիների և զբոսաշրջիկների շրջանում»,–հավելել է Ղազինյանը։
Նրա խոսքով` նախագծի նպատակը վարչարարության արդյունավետության ապահովումն է, ինչպես նաև տնտեսվարող սուբյեկտների, առավելապես ծխախոտի օգտագործման մասնագիտացված օբյեկտների արդյունավետ գործունեության իրավունքը:
Հիշեցնենք, որ մարտի 15-ից ուժի մեջ է մտել հանրային սննդի վայրերում ծխելու արգելքը: Խոսքը նաև բացօթյա օբյեկտների մասին է (ճաշարաններ, ռեստորաններ, սրճարաններ և այլն):
ԱԺ –ի ընդունած «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի հիմնական դրույթները սկսել են գործել 2020-ի մարտի 21-ից: Իսկ որոշ դրույթներ ուժի մեջ են մտնում աստիճանաբար` հնարավորություն տալով պատրաստվել դրանց: