ԵՐԵՎԱՆ, 1 ապրիլի - Sputnik. Ռուսաստանի ամենահարուստ ձեռնարկատերերի ընդհանուր կարողությունը տարեսկզբից նվազել է 50,1 մլրդ դոլարով, իսկ ամենից շատ կորցրել է «Լուկօյլի» համասեփականատեր Վագիթ Ալեքպերովը, որի կարողությունը նվազել է 17,4 միլիարդով, ու նրա կարողությունը քառակի նվազել է։ Այս թվերը Bloomberg Billionaires Index (BBI) վարկանիշի տվյալների հիման վրա հաշվարկել է ՌԻԱ Նովոստին:
Ինդեքսը հաշվարկվում է այն ընկերությունների բաժնետոմսերի արժեքի հիման վրա, որոնցում միլիարդատերերը բաժնեմասեր ունեն: BBI վարկանիշը ներառում է աշխարհի 500 ամենահարուստ մարդկանց։ Այժմ ցուցակում ՌԴ 22 քաղաքացի է ընդգրկված: Նրանց ընդհանուր կարողությունը ապրիլի 1-ի դրությամբ կազմել է 299,47 մլրդ դոլար։
Ռուսաստանի ամենահարուստ մարդն այժմ «Նորնիկելի» հիմնական սեփականատերերից Վլադիմիր Պոտանինն է, տարեսկզբից նա 1,47 մլրդ դոլար է կորցրել, բայց նրա կարողությունը դեռ 29,4 մլրդ է:
Զգալիորեն նվազել է նաև «Նովատեկի» համասեփականատեր Լեոնիդ Միխելսոնի կարողությունը, այն պակասել է 4,9 մլրդ դոլարով՝ հասնելով 27,5 մլրդ դոլարի: Նա վարկանիշային աղյուսակում զբաղեցնում է երկրորդ տեղը։ Երրորդ տեղում է «Սևերստալի» հիմնական սեփականատեր Ալեքսեյ Մորդաշովը, որի կարողությունը նվազել է 5,7 մլրդ դոլարով՝ հասնելով 23,1 մլրդ դոլարի:
Վարկանիշի չորրորդ տեղում է Նովոլիպեցկի մետալուրգիական կոմբինատի շահառու Վլադիմիր Լիսինը, որի կարողությունը նվազել է 4,97 միլիարդով՝ հասնելով 23 միլիարդ դոլարի: Հինգերորդ տեղը զբաղեցնում է Ալիշեր Ուսմանովը («Մետալոինվեստ», «Մեգաֆոն»), տարեսկզբից նրա կարողությունը նվազել է 1,5 մլրդ դոլարով, այժմ այն 19,8 մլրդ է: Ցանկի 6-րդ տեղում է «Եվրոխիմայի» ու Սիբիրի ածխային էներգետիկ ընկերության շահառու Անդրեյ Մելնիչենկոն, որի կարողությունն աճել է 152 մլն դոլարով՝ հասնելով 17,6 մլրդ դոլարի:
Ցուցակում յոթերորդն է դարձել «Ռենովայի» հիմնական սեփականատեր Վիկտոր Վեկսելբերգը, որի կարողությունը տարեսկզբից նվազել է 1,42 մլրդ դոլարով ու կազմել է 17,1 մլրդ դոլար: 8-րդ տեղում է Գենադի Տիմչենկոն, որը բաժնեմասեր ունի «Նովատեկում» ու «Սիբուրում», նա աղքատացել է 6,03 մլրդ դոլարով, հիմա ունի 16,4 մլրդ դոլար:
Ցուցակի իններորդ տեղում Ռոման Աբրամովիչն է (Evraz), որի կարողությունը տարեսկզբից նվազել է 3,6 մլրդ դոլարով ու կազմել 14,4 մլրդ դոլար: Առաջատարների տասնյակը եզրափակում է Սուլեյման Քերիմովը, որի ընտանիքը վերահսկում է «Պոլյուս» ընկերությունը։ Նրա կարողությունը նվազել է 884 մլն դոլարով ու կազմել է 14,3 մլրդ դոլար: