ԵՐԵՎԱՆ, 1 ապրիլի – Sputnik. Երգիչ Անդրեն, որը մեկ շաբաթ առաջ ԱՄՆ–ի հիվանդանոցներից մեկում ողնաշարի հատվածում վիրահատություն է տարել, կրկին սկսել է քայլել։
Երգիչը տեսանյութ է հրապարակել «Ֆեյսբուքի» իր էջում և կից գրառում կատարել` շնորհակալություն հայտնելով իր հարազատներին ու երկրպագուներին անհանգստանալու, ինչպես նաև աղոթելու համար։
Տեսանյութում երևում է, որ Անդրեն ձեռնափայտով է տեղաշարժվում և մեծ դժվարությամբ է քայլեր անում։
«Շնորհիվ Ամենակարողի ողորմության, ձեր աղոթքների, Հայաստանի և ԱՄՆ–ի սրտացավ և պորֆեսիոնալ բժիշկների, այսօր առաջին քայլերս արեցի։ Առջևում դեռ տևական վերականգնողական աշխատանքներ ունեմ անելու, կարևորն արդեն դրականը տեսանելի է։ Այն, որ մեծ դժվարությամբ, բայց կարողանում եմ քայլել, արդեն իսկ հաղթանակ է»,– գրել է Անդրեն։
Նա շեշտել է, որ կրկին քայլելը իր համար մտահոգվող անձանց միասնականության և փոխադարձ սիրո հաղթանակն է։
Բազմաթիվ հետևորդներ մեկնաբանություններ են թողել, առողջություն մաղթելով արտիստին ու հայտնելով, որ աղոթում են վերջինիս առողջության համար։
«Շուտափույթ ապաքինում, թանկագինս», «Աստված քեզ օրհնել և պահում է Անդրե ջան, սիրում ենք քեզ շատ», «Շատ առողջություն քեզ, Անդրե ջան», «Աստված քեզ հետ, մեր տաղանդավոր Անդրե», «Շատ ուրախացա», «Աստված առաջ, Անդրե ջան, ծանր շրջանը անցել եք, ամեն ինչ լավ է լինելու»,- գրել են երկրպագուները։
Հիշեցնենք, որ դեռ մարտի 24-ին նա տեղեկացրել էր, որ հայտնվել էր կյանքի ու մահվան շեմին ու հիվանդանոցում է։ Հրապարակ տեսանյութերից երևում էր, որ նրան կաթիլայիններ ու այլ հատուկ սարքեր էին միացված
Նշենք` մինչ օրս երգիչը հստակ չի նշել, թե ինչ խնդիր է իր մոտ։