ԵՐԵՎԱՆ, 1 ապրիլի – Sputnik. Ռուսաստանի նախագահ Վլադիմիր Պուտինն այսօր իր թուրք գործընկեր Ռեջեփ Թայիփ Էրդողանի հետ ունեցած հեռախոսազրույցի ընթացքում սկզբունքային գնահատականներ է տվել Մոսկվայի և Կիևի բանակցություններին, հայտնում է Կրեմլի մամուլի ծառայությունը։
Նշվում է, որ Պուտինը շնորհակալություն է հայտնել թուրքական կողմին մարտի 29-ին Ստամբուլում Ռուսաստանի և Ուկրաինայի ներկայացուցիչների բանակցությունների հերթական փուլն անցկացնելու հարցում աջակցություն ցուցաբերելու համար։
Հատուկ գործողությունների համատեքստում մարդասիրական հարցերի քննարկման ժամանակ Էրդողանը շնորհակալություն է հայտնել` մարտական գործողությունների գոտուց Թուրքիայի քաղաքացիներին և առևտրային նավերը տարհանելու հարցում ՌԴ ՊՆ–ի գծով ցուցաբերած օգնության համար։
«Անդրադարձ է կատարվել նաև երկկողմ համագործակցության զարգացման թեմային։ Պայմանավորվածություն է ձեռք բերվել հետագա շփումների վերաբերյալ», – հայտնում է մամուլի ծառայությունը։
Մարտի 29-ին Ստամբուլում կայացան ռուս–ուկրաինական բանակցությունները։ Բանակցությունների արդյունքներով Ուկրաինան թղթի վրա փոխանցեց հնարավոր ապագա համաձայնագրի սկզբունքները, որոնք նախատեսում են հրաժարում ՆԱՏՕ– անդամակցությունից, Ուկրաինայի արտադաշինքային կարգավիճակի արձանագրում, հրաժարում միջուկային զենքից, ինչպես նաև զանգվածային խոցման այլ զինատեսակների տիրապետումից, ձեռքբերումից և մշակումից, օտարերկրյա ռազմաբազաներ և զինվորական անձնակազմեր տեղակայելուց։
Ռուսաստանը «հակամարտության դեէսկալացիայի գծով երկու քայլի» մասին է հայտարարել. Կիևի և Չեռնիգովի ուղղություններով ռազմական ակտիվության նվազեցում, ինչպես նաև պատրաստակամություն՝ կազմակերպելու երկու երկրների առաջնորդների հանդիպումը։