ԵՐԵՎԱՆ, 1 ապրիլի – Sputnik. «Chanel» լեգենդար տան արտասահմանյան խանութներին արգելել են լյուքս դասի արտադրանք վաճառել ռուսաստանցիներին։ Instagram–ի (պատկանում է Meta կորպորացիային, որը ճանաչվել է ծայրահեղական և արգելված է Ռուսաստանում) «սթորիզ» բաժնում այդ մասին պատմել է օգտատեր Լիզա Լիտվինը։
Լիտվինը «Chanel»–ի պայուսակի լուսանկար է հրապարակել և նշել, որ ԱՄԷ–ում խանութի աշխատակիցները հրաժարվել են իրեն վաճառել այդ պայուսակը։
«Ինձ չվաճառեցին պայուսակը, քանի որ ես Ռուսաստանից եմ։ Այսօրվանից նրանք կարգադրություն ունեն, որ կարող են վաճառել միայն այն դեպքում, եթե ես թուղթ ստորագրեմ, որ չեմ պատրաստվում այն տանել Ռուսաստան և այնտեղ այն կրել», – գրել է նա։
Լիզա Լիտվինի հրապարակած լուսանկարում երևում է այն ձևաթուղթը, որը պետք է ստորագրեն հաճախորդները։
«Ահա այսպիսի տեսք ունի այն փաստաթուղթը, որը պետք է ստորագրեն ռուսները, եթե ցանկանում են Chanel–ի արտադրանք գնել։ Բառացի գրված է. «Ես Ռուսաստանում չեմ բնակվում և գնված իրերը ՌԴ տարածքում չեմ կրելու»», – հավելել է նա։
Ավելի ուշ Լիտվինը Super.ru–ին ասել է, որ միջադեպը տեղի է ունեցել «Mall of the Emirates» առևտրի կենտրոնում գործող «Chanel»–ի խանութում։
Նա հավելել է, որ վերոնշյալ պայմանների պատճառով հրաժարվել է գնումից։ Ըստ նրա` այլ ապրանքանիշների խանութներում ռուսաստանցիներին նման պահանջներ չեն ներկայացնում։
«Chanel»–ի ներկայացուցիչները այս առնչությամբ դեռ որևէ մեկնաբանություն չեն տվել։
Հիշեցնենք, որ մարտին «Kering» ընկերությունների խումբը, որին պատկանում են «Gucci», «Balenciaga» և «Yves Saint Laurent» ապրանքանիշները, հայտարարել է, որ Ուկրաինայի իրավիճակի ֆոնին փակում է Ռուսաստանում գործող իր խանութները ։ Բացի այդ, ՌԴ–ում 124 խանութ է փակել ֆրանսիական «Louis Vuitton» նորաձևության տունը։ Ժամանակավոր փակ են նաև «Hermes» և «Chanel» խանութները։