ԵՐԵՎԱՆ, 31 մարտի – Sputnik. Երևանի առաջիկա ՏԻՄ ընտրություններում «Քաղաքացիական կուսակցության» ցուցակը գլխավորելու է Տիգրան Ավինյանը։ Sputnik Արմենիայի հետ զրույցում տեղեկությունը հայտնեց ՔՊ հանրային կապերի համակարգող Վահագն Ալեքսանյանը։
«Տիգրան Ավինյանը քաղաքապետի մեր թեկնածուն է»,- նշեց Ալեքսանյանը։
Նա շեշտեց, որ այս պահին իրենց ամբողջ թիմն աջակցում է քաղաքապետ Հրաչյա Սարգսյանին իր գործում։
«Իսկ առաջիկա ՏԻՄ ընտրություններում նախընտրական ցուցակը կգլխավորի Տիգրան Ավինյանը»,- նշեց նա։
Ալեքսանյանը հավելեց, որ մինչ ընտրությունները Տիգրան Ավինյանը շուտով կդառնա Երևանի փոխքաղաքապետ։
Հիշեցնենք` 2020-ի դեկտեմբերի 22-ին Երևանի ավագանին արտահերթ նիստ հրավիրեց և անվստահություն հայտնեց Հայկ Մարությանին, որը քաղաքապետ էր ընտրվել 2018թ. սեպտեմբերի 23-ին կայացած Երևանի ավագանու ընտրությունների արդյունքներով։
Նրա փոխարեն դեկտեմբերի 25–ին Երևանի քաղաքապետի պաշտոնը ստանձնեց Հրաչյա Սարգսյանը, որը 4 տեղակալ ունի` 1-ը՝ առաջին տեղակալ, 3-ը՝ տեղակալ։
Հավելենք` Տիգրան Ավինյանը 2018 թվականի մայիսից մինչև 2021 թվականի օգոստոսը ՀՀ փոխվարչապետն էր։
Դրանից հետո նա նշանակվեց Հայաստանի պետական հետաքրքրությունների ֆոնդի (ANIF) տնօրենների խորհրդի նախագահ։
2022–ից Ավինյանը «Հայբիզնեսբանկի» տնօրենների խորհրդի անդամ է, «Հայաստանի ազգային պոլիտեխնիկական համալսարան» հիմնադրամի հոգաբարձուների խորհրդի նախագահ։
Նշենք, որ Երևանի ավագանու ընտրությունները նախատեսված են 2023 թվականին։