Ձկնորսության վերահսկողությունն առհասարակ պրակտիկ գործընթացների հետ կապ չունի. դա պայմանավորված է տեխնիկական հակասություններով, որովհետև հնարավոր չէ վերահսկել, առավել ևս կշռել կամ հաշվարկել Սևանա լիճ մտած անձանց կամ կազմակերպությունների որսած ձկնապաշարները։ Sputnik Արմենիայի հետ զրույցում այս մասին ասաց «Հայ ձկնարտադրողների ու ձկնարտահանողների միասնություն» ՀԿ–ի նախագահ Արթուր Աթոյանը։
«Կան խմբեր, որոնք որսը կազմակերպում են գիշերվա ընթացքում, և այդ ժամերին վերահսկող մարմինները չեն կարող Սևանա լճի ամբողջ ավազանի երկայնքով համարժեք հսկողություն իրականացնել, որպեսզի պարզեն` թույլատրելի 300 տոննան լրացավ, թե ոչ։ Դա ձևական բնույթ կրող հերթական որոշումների շարքից է»,– ասաց Աթոյանը։
Նա վստահ է, որ ոչ մի ձկնորս իր բռնած ձուկը չի չափի, որ եթե չափսը չհամապատասխանի, ձուկը նորից բաց թողնի լիճ։ Ձկնորսական ցանցերի պարամետրերի հետ կապված հարցը նույնպես հարաբերական է, հնարավոր է որ չափսերը խախտած մի քանի անձի հայտնաբերեն, մի քանի ցանց առգրավեն, բայց դա համատարած չի կարող լինել, առավել ևս, որ վերահսկողություն իրականացնող մարմինն էլ այդքան ռեսուրսներ չունի, որ ամբողջությամբ հետևի չափորոշիչների պահպանման գործընթացին։
«Եթե նախորդ տարի որսի ենթակա սիգի չափաքանակը սահմանվել էր 250 տոննա, իսկ այս տարի` 300 տոննա, նշանակում է, որ սիգի պաշարներն ավելացել են և յուրաքանչյուր տարի բնական աճը կազմում է 50 տոննա։ Այդուհանդերձ մյուս կողմից էլ չեն կարող անտեսել չափարոշիչների հանգամանքը, հակառակ դեպքում կլինի այն, ինչ եղավ քսանհինգ տարի առաջ, երբ սիգի պաշարները գրեթե սպառման եզրին էին, և մենք հայտնվեցինք բնապահպանական ճգնաժամի մեջ»,– ասաց «Հայ ձկնարտադրողների ու ձկնարտահանողների միասնություն» ՀԿ նախագահը։
Աթոյանի դիտարկմամբ` ձկնորսության արգելքի դիմաց Սևանա լճի ափամերձ բնակավայրերի բնակիչներին չի առաջարկվել որևէ այլընտրանք, այնինչ կան արդյունավետ միջոցներ, որոնք Հայաստանում չեն կիրառվում, և այդ հարցում միջազգային փորձն առհասարակ չի ուսումնասիրվել։ Նրա համոզմամբ` նախ պետք է մարդկանց համար պայմաններ ստեղծեն, որպեսզի նրանք օրվա հացը հայթայթեն և ձկնորսության արգելված սեզոնին Սևանա լիճ չմտնեն։
Նշենք, որ Սևանա լճում արդյունագործական ձկնորսության 2022թ–ի թույլտվության համար ՀՀ շրջակա միջավայրի հետ պայմանագրեր հնարավոր կլինի կնքել արդեն ապրիլի 1-ից։ Դրանց գործողության ժամկետը կավարտվի 2022 թվականի սեպտեմբերի 1-ին։
Որոշմամբ սահմանվել է նաև որսի թույլատրելի քանակը։ Ըստ այդմ, այս տարի Սևանից թույլատրվում է որսալ ընդհանուր 300 տոննա սիգ։
Նախորդ տարի թույլատրելի քանակը կազմել է 250 տոննա։ Որսի ենթակա յուրաքանչյուր ձկան նվազագույն քաշը պետք է լինի 400 գրամ, երկարությունը` 31 սանտիմետր։
Հավելենք, որ 2022թ–ի նոյեմբերի 15–ից 2023թ–ի հունվարի 20–ը սիգի որսը ՀՀ–ում արգելվում է, քանզի դա սիգի ձվադրման ժամանակաշրջանն է։