ԵՐԵՎԱՆ, 31 մարտի – Sputnik. Սևանա լճում արդյունագործական ձկնորսության 2022թ–ի թույլտվության համար ՀՀ շրջակա միջավայրի հետ պայմանագրեր հնարավոր կլինի կնքել արդեն ապրիլի 1-ից։ Դրանց գործողության ժամկետը կավարտվի 2022 թվականի սեպտեմբերի 1-ին։
Որոշումն ընդունվել է կառավարության այսօրվա նիստում` նախարարության առաջարկով։
Որոշմամբ սահմանվել է նաև որսի թույլատրելի քանակը։ Ըստ այդմ, այս տարի Սևանից թույլատրվում է որսալ ընդհանուր 300 տոննա սիգ։ Յուրաքանչյուր ձկան նվազագույն քաշը պետք է լինի 400 գրամ, երկարությունը` 31 սանտիմետր։
2022թ–ի նոյեմբերի 15–ից 2023թ–ի հունվարի 20–ը սիգի որսը ՀՀ–ում արգելվում է, քանի որ այդ ընթացքում սիգի ձվադրման ժամանակն է։
Նշենք, որ սիգի որսը թույլատրվում է ափից առնվազն 500 մ հեռավորության վրա, իսկ արդյունագործական որսն իրականացվում է դնովի ցանցերով։ Արգելվում է որս կատարել հանգուցային, մեքենայական կամ ձեռքով գործված ինթետիկ ցանցավանդակներով ու ձկնորսական ուռկաններով։
2022 թվականի համար Սևանա լճում կարասի ու խեցգետնի արդյունագործական որսի չափաքանակ չի սահմանվել, ինչը նշանակում է, որ այս տեսակների համար սահմանափակումներ չեն գործի։
Հիշեցնենք` 2020-ին ՀՀ կառավարությունն առաջին անգամ որոշում կայացրեց Սևանում արդյունագործական որսն իրականացնել անհատների ու կազմակերպությունների հետ նախապես կնքված պայմանագրերի հիման վրա։ Սահմանվեցին հստակ չափորոշիչներ ու ժամկետներ։
Առաջին տարում շրջակա միջավայրի նախարարության և ձկնորսների միջև կնքվեց 255 պայմանագրեր` 236 տոննա սիգի որս իրականացնելու համար։ 2021թ–ին կնքվեց 303 պայմանագիր` 221 տոննա 164 կգ ձկան որս իրականացնելու համար։