ԵՐԵՎԱՆ, 31 մարտի – Sputnik. Աշխարհում պարենային ճգնաժամին միգրացիայի նոր ալիք կհաջորդի՝ նախևառաջ դեպի Եվրոպա։ Այսօր խորհրդակցության ժամանակ հայտարարել է Ռուսաստանի նախագահ Վլադիմիր Պուտինը։
Ավելի վաղ գերմանական մամուլը գրել էր, որ աշխարհում սով է սպասվում: Նշվում էր, որ Ռուսաստանին և Ուկրաինային բաժին է ընկնում ցորենի համաշխարհային մատակարարումների մինչև 30 տոկոսը, իսկ այժմ այդ երկու երկրները կտրված են համաշխարհային շուկայից: Առավել խոցելի վիճակում են հայտնվել հացահատիկի խոշորագույն ներկրողները՝ Հյուսիսային Աֆրիկայի և Մերձավոր Արևելքի երկրները։
Պուտինը նշել է, որ արևմտյան քաղաքական գործիչները որոշումներ են ընդունում, որոնք համաշխարհային տնտեսությանը դրդում են ճգնաժամի:
«Հանգեցնում են արտադրական և լոգիստիկ կապերի խզման, գնաճի ուժեղացման, միլիոնավոր մարդկանց բարեկեցության նվազման։ Իսկ ամենաաղքատ երկրներում՝ նաև զանգվածային սովի», - ասել է ՌԴ նախագահը։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 36–րդ օրը։