ԵՐԵՎԱՆ, 31 մարտի – Sputnik. Ռուսաստանը, ի պատասխան եվրոպական պատժամիջոցներին, «սև ցուցակում» է ներառել Եվրամիության բարձրագույն ղեկավարությանը։ ՌԻԱ Նովոստիի փոխանցմամբ՝ հայտարարել է ՌԴ արտաքին գործերի նախարարությունը։
«Սահմանափակումները տարածվում են Եվրամիության բարձրագույն ղեկավարության վրա, այդ թվում՝ մի շարք եվրահանձնակատարների և ԵՄ ռազմական կառույցների ղեկավարների, ինչպես նաև Եվրոպական խորհրդարանի պատգամավորների ճնշող մեծամասնության վրա, որոնք հակառուսական քաղաքականություն են առաջ տանում»,- նշված է ՌԴ ԱԳՆ տարածած հայտարարության մեջ։
Նշվում է, որ ՌԴ կազմած «սև ցուցակում» ընդգրկված են ԵՄ անդամ որոշ երկրների կառավարությունների և խորհրդարանների ներկայացուցիչներ, ինչպես նաև հասարակական գործիչներ և ԶԼՄ-ների աշխատակիցներ։
Ըստ պարզաբանման՝ այս ցանկում ընդգրկված գործիչներն անձնական պատասխանատվություն են կրում հակառուսական պատժամիջոցների առաջխաղացման, ռուսատյաց տրամադրությունների բորբոքման, ռուսալեզու բնակչության իրավունքների ոտնահարման համար։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 36–րդ օրը։