Նիկոլ Փաշինյանը, հատկապես վերջին 10 օրվա ընթացքում, հանրությանն իր հայտարարություններով նախապատրաստում է ծանր զիջումների։ Իրավիճակն այնպես է հանրությանը փոխանցում, որպեսզի նրա կողմից վատագույն փաստաթուղթ ստորագրելու դեպքում էլ հանրությունը մտածի, թե Փաշինյանն իր ստորագրությամբ ուղղակի կանխել է պատերազմը։ Sputnik Արմենիայի եթերում նման տեսակետ հայտնեց ընդդիմադիր «Պատիվ ունեմ» խմբակցության պատգամավոր Տիգրան Աբրահամյանը՝ հատուկ ընդգծելով, որ Փաշինյանի հայտարարություններն անգամ մեկնաբանել պետք չէ։
«Փաշինյանն ո՞վ է, որ իր հայտարարությունները մեկնաբանենք։ Նա՞ պետք է ասի, թե ՊԲ-ի Արցախից դուրս բերումն ինչ է նշանակում, որ իմանանք։ Ի՞նչ է ասել այս իշխանությունը, որ այս ընթացքում իրականությանը համապատասխանել է կամ մեր հասարակության ու քաղաքացիների շահերն է շոշափել»,- հայտարարեց Աբրահամյանը։
Ընդդիմադիր պատգամավորը կարծում է, որ Փաշինյանը մեկնում է Ալիևի հետ հանդիպման՝ փաստաթղթով ու իրավականորեն ամրագրելու այն, ինչ, ըստ էության, եղել է իր պաշտոնավարման ողջ ժամկետի քննարկման առարկան՝ Արցախի հարցից ձերբազատվելը և ուղղակի Արցախի հետ կապված հարցերից պատասխանատվությունից խուսափելը։
«Այսօր փաստ է, որ Արցախում ստեղծված իրավիճակը Նիկոլ Փաշինյանի իշխանության գալու և նրա վարած քաղաքականության հետևանքն է։ Իրադրությունն ամենավատ սցենարներով անընդհատ զարգանալու է և զարգանալու է այնքան, քանի դեռ այս իշխանության ղեկին Նիկոլ Փաշինյանն ու իր նմաններն են»,- ասաց պատգամավորը։
Աբրահամյանի ձևակերպմամբ՝ Փաշինյանն իր հայտարարություններով, քայլերով ու գործողություններով այնպիսի իրավիճակ է ստեղծել, որ Արցախում մենք անընդհատ ունենալու ենք իրավիճակի վատթարացում։
«Նիկոլ Փաշինյանի իշխանության շարունակականությունը միայն վատթարացնում և ավելի բարդացնում է Հայաստանի ու Արցախի վիճակը»,-հավելեց նա։
Հիշեցնենք, որ մարտի 31-ի կառավարության նիստի ընթացքում Նիկոլ Փաշինյանը մի շարք հայտարարություններ արեց Արցախում իրավիճակի և Ադրբեջանի հետ բանակցությունների մասին։
Նա ՀՀ կողմից պատրաստակամությունը հայտնեց Ադրբեջանի հետ ստորագրելու խաղաղության պայմանագիր, ասաց, որ ըստ իրեն Հայաստանը պատրաստ է խաղաղության բանակցությունների անհապաղ մեկնարկին և հույս հայտնեց Բրյուսելում նախատեսված հանդիպման ժամանակ Ադրբեջանի նախագահի հետ քննարկել և համաձայնեցնել խաղաղության բանակցությունների մեկնարկի հետ կապված բոլոր հարցերը։ Բացի այդ, նա հայտարարեց, որ Ադրբեջանը պահանջում է ըստ էության Արցախից պաշտպանության բանակի դուրս բերում, իսկ դա կնշանակի Արցախի հայերի դուրս բերում։