ԵՐԵՎԱՆ, 30 մարտի – Sputnik. Ուկրաինական ճգնաժամի ֆոնին Ռուսաստանի Դաշնությունից, Ուկրաինայից և Բելառուսից Հայաստան տեղափոխված 34 սովորող ընդգրկվել է Երևանի տարբեր դպրոցներում։ Տեղեկությունը հայտնում են Երևանի քաղաքապետարանի մամուլի ծառայությունից։
Աշակերտներն ուսումը շարունակում են Երևանի թիվ 7, 20, 35, 69, 77, 78, 106, 124, 132, 138, 164 դպրոցներում: Մասնավորապես, 30 սովորողի կրթությունը կազմակերպվում է ռուսերենով ուսուցմամբ դասարաններում, 4 սովորողներինը՝ հայերենով ուսուցմամբ դասարաններում:
«1-4-րդ դասարաններն այլ երկրներում օտար լեզվով ուսուցմամբ հաստատությունում (դասարանում) սովորած ՀՀ քաղաքացիների երեխաները հայրենիք վերադառնալիս ուսումը շարունակում են հայերենով ուսուցմամբ համապատասխան դասարանում՝ համաձայն անհատական ուսուցման պլանի: Ուսումնառության ընթացքում առնվազն 5 տարի անընդմեջ այլ երկրներում օտար լեզվով ուսուցմամբ դասարաններում սովորած ՀՀ քաղաքացիների երեխաները Հայաստան վերադառնալիս կարող են ուսումը շարունակել օտար լեզվով ուսուցմամբ համապատասխան դասարաններում` դրանց առկայության դեպքում»,– ասված է հաղորդագրությունում:
Սովորողին հանրակրթության մեջ ընդգրկելու գործընթացն իրականացվում է համաձայն Հայաստանի Հանրապետության կրթության և գիտության նախարարի 2010 թվականի հրամանի, համաձայն որի օտարերկրյա քաղաքացիները, երկքաղաքացիները, ՀՀ քաղաքացիություն չունեցողները, ինչպես նաև այն դեպքում, երբ ծնողներից մեկն է ՀՀ քաղաքացի, մյուսը` նշվածներից որևէ մեկը, երեխայի ուսուցման լեզվի ընտրությունը կատարում են ինքնուրույն: Մնացած դեպքերում, երբ սովորողի ծնողները Հայաստանի քաղաքացիներ են, ուսուցման լեզուն հայերենն է:
Նշվում է, որ Երևանի ենթակայության դպրոցներից ռուսերենով ուսուցում իրականացվում է Կենտրոն վարչական շրջանի թիվ 7, 8, 55, Էրեբունու 35, Շենգավիթի 69, Արաբկիրի 77, Աջափնյակի 122, Ավանի 124, Արաբկիրի 132, Քանաքեռ-Զեյթունի 147, Նոր Նորքի 164, Մալաթիա-Սեբաստիայի 176, Դավթաշենի 192 դպրոցներում։ Այնտեղ գործում են ռուսերենով ուսուցմամբ դասարաններ: