ԵՐԵՎԱՆ, 30 մարտի – Sputnik. ՀՀ արտակարգ իրավիճակների նախարար, Հայաստանի ազգային հերոս Անդրանիկ Փիլոյանը քիչ առաջ ձերբակալվել է։ Տեղեկությունը Sputnik Արմենիայի հետ զրույցում հաստատեցին հակակոռուպցիոն կոմիտեից։
Մեր աղբյուրներն ավելի վաղ հայտնել էին, որ հակակոռուպցիոն կոմիտեն երեկ հարցաքննության է հրավիրել Փիլոյանին: Երեկվա դրությամբ նախարարը հարուցված քրեական գործով որևէ կարգավիճակ չուներ։
Մեր տեղեկություններով` այս պահին ԱԻՆ-ի որոշ աշխատակիցներ գործով ձերբակալված են:
Sputnik Արմենիան փորձեց նախարարի ձերբակալության վերաբերյալ որևէ տեղեկություն ստանալ նաև ԱԻՆ–ից, սակայն մամուլի ծառայությունից մեզ պատասխանեցին` տեղյակ չեն, որ նախարարը ձերբակալվել է։
ArmLur.am-ը հայտնել էր, որ հակակոռուպցիոն կոմիտեում ԱԻՆ պաշտոնատար անձանց կոռուպցիոն գործողությունների փաստի առթիվ հարուցված քրեական գործով ԱԻՆ–ի շուրջ 150 աշխատակից է հարցաքննվել, որոնց մեծ մասին մեղադրանք է առաջադրվել, և ավելի քան 5 հոգի էլ կալանավորվել է: Ըստ լրատվամիջոցի` ԱԻՆ-ի պաշտոնյաները տարբեր անձանց պաշտոնների նշանակման գործընթացում կոռուպցիոն գործարքների են գնացել, ու շղթան, ըստ լուրերի, հասնում է նախարար Անդրանիկ Փիլոյանին: Ավելին` գործով անցնող անձինք ցուցմունքներում տվել են նախարարի անունը:
Հիշեցնենք` ՀՀ վարչապետ Նիկոլ Փաշինյանը Փիլոյանին 14 օրով արձակուրդ է ուղարկել։
Երեկ ՀՀ Ազգային անվտանգության ծառայությունը խուզարկություն էր իրականացրել ԱԻՆ–ում։