ԵՐԵՎԱՆ, 29 մարտի – Sputnik. Հունգարիայի մայրաքաղաք Բուդապեշտի «Բոկ Սպորտ Հալլ» մարզադահլիճում այսօր ընթացող Եվրոպայի առաջնությունում 79 կգ քաշային Արման Ավագյանը համառ պայքարում 7։9 հաշվով պարտվեց վրացի Վլադիմիր Գամկրելիձեին բրոնզե մեդալի համար գոտեմարտում։
79 կգ քաշային կարգում հանդես եկող Արման Ավագյանն իր մեկնարկային գոտեմարտում պարտվեց ադրբեջանցի Աշրաֆ Աշիրովին։ Բայց քանի որ Աշիրովը հասավ մինչև եզրափակիչ, Ավագյանը իրավունք վաստակեց սփոփիչ գոտեմարտի միջոցով պայքարել բրոնզե մեդալի համար։ Եվ այդ գոտեմարտում 8։0 հաշվով հաղթանակի հասավ բուլղարացի Միրոսլավ Կիրովի նկատմամբ։
Երրորդ տեղի համար գոտեմարտում Ավագյանի մրցակիցը վրացի Վլադիմիր Գամկրելիձեն էր։ Այսինքն`հայ-վրացական ևս մեկ դիմակայություն Եվրոպայի առաջնությունում։ Եվ նորից համառ պայքար։ Արմանը երկար ժամանակ հաղթում էր, իսկ երբ հաջողվեց չորս միավորանոց գցումը, կարծես թե հաղթանակը շատ մոտեցավ։ Բայց Գամկրելիձեն հետ բերեց կորցրածը ու երկու միավոր էլ ավելին վաստակեց։
Վաղը ազատ ոճայինների մրցումներում Հայաստանի հավաքականը ևս մեկ հնարավորություն ունի Եվրոպայի չեմպիոնի կոչումը նվաճելու համար։ 61 կգ քաշային կարգում Արսեն Հարությունյանը կիսաեզրափակիչում պարտվում էր Լեհաստանը ներկայացնող Էդուարդ Գրիգորևին` 0։6 հաշվով, բայց Արսենը հերթական անգամ բեկեց գոտեմարտի ընթացքն ու վերջնական հաղթանակի հասավ 13։8 հաշվով։ Եզրափակիչում Հարությունյանի մրցակիցն է լինելու թուրք Սուլեյման Աթլին։
Բրոնզե մեդալի համար գոտեմարտը կանցկացնի 74 կգ քաշային Հրայր Ալիխանյանը, որը երկու հաղթանակներից հետո կիսաեզրափակիչում զիջեց Իտալիան ներկայացնող բազմափորձ Ֆրանկ Չամիզո Մարկեսին։