ԵՐԵՎԱՆ, 29 մարտի – Sputnik. Թուրքիան ու Իսրայելը քննարկում են Թուրքիայից դեպի Լեվիաթան՝ Իսրայելի ամենամեծ բնական գազի հանք, գազատարի կառուցումը։ Գազը կգնա Թուրքիա, որտեղից էլ կմատակարարվի հարևան եվրոպական երկրներ, որոնք այս պահին ռուսական գազի այլընտրանք են փնտրում։ Այս մասին հայտնում է միջազգային Reuters լրատվական գործակալությունը՝ հղում անելով իր աղբյուրներին։
Թուրքիայի նախագահ Ռեջեփ Թայիփ Էրդողանը հայտարարել էր, որ գազի շուրջ համագործակցությունը երկկողմ հարաբերություններում կարող է լինել ամենակարևոր քայլերից մեկը։
Թուրք բարձրաստիճան պաշտոնյաներից մեկը, ում անունը չի նշվում, Reuters-ին հայտնել է, որ Իսրայելի նախագահ Իսահակ Հերցոգի` Թուրքիա այցից հետո այս հարցն ինտենսիվ քննարկվում է կողմերի միջև և հավանական է՝ հարցի շուրջ եկող ամիսներին հստակ որոշումներ լինեն։ Մեկ այլ թուրք պաշտոնյա էլ ասել է, որ Թուրքիան ցանկանում է իսրայելական գազը տարանցել դեպի Եվրոպա, և Իսրայելը դրան դրական է վերաբերվում։
Իսրայելի էներգետիկայի նախարար Կարինե Էլհարրարն էլ հայտարարել է, որ կողմերի միջև դեռ շատ հարցեր պետք է քննարկվեն, այդ թվում՝ ֆինանսական։
Նշենք, որ Թուրքիայի և Իսրայելի հարաբերությունները վերջին 10-ը տարում մեծամասամբ Պաղեստինի շուրջ ծագած հակասությունների պատճառով լարված էին։ Վերջին շրջանում կողմերը փորձում են բարելավել կապը, վերականգնել դիվանագիտական հարաբերությունները։
Միջազգային գործակալությունը նշում է, որ իրականում սա որպես ռուսական գազին այլընտրանք դարձնելը որոշակի խնդիրներ ունի․նախ Լեվիաթանն արդեն իսկ գազ է մատակարարում Իսրայելի, Հորդանին և Եգիպտոսին։ Սեփականատերերը ձգտում են տարեկան արտադրությունը 12 մլրդ խորանարդ մետրից բարձրացնել մինչև 21 մլրդի։ Համեմատության համար ասենք, որ ԵՄ-ն անցած տարվա ընթացքում Ռուսաստանից 175 մլրդ խորանարդ մետր գազ է ներկրել, ինչը Եվրոպայի ծախսած գազի ընդամենը 40 տոկոսն է ապահովել։ Ցանկացած դեպքում, ոլորտի ներկայացուցիչները թերահավատորեն են մոտենում այս հարցին, ասում են՝ հնարավոր է աշխարհաքաղաքականությունն այս պլանները ջուրը գցի։
Հիշեցնենք, որ փետրվարի 24-ին Ռուսաստանի նախագահ Վլադիմիր Պուտինը հայտարարեց Ուկրաինայի նկատմամբ հատուկ գործողություն սկսելու մասին, ինչից հետո արևմտյան, այդ թվում՝ ԵՄ անդամ, մի շարք երկրներ սկսեցին տարբեր ոլորտների վերաբերող հակառուսական պատժամիջոցներ կիրառել։
ՌԴ նախագահ Պուտինն էլ իր հերթին հայտարարեց, որ այսուհետ Ռուսաստանը ռուբլով է կատարելու ոչ բարեկամական երկրներին գազ մատակարարելու հաշվարկները: Նա ԿԲ-ին և կառավարությանը հանձնարարել է մեկշաբաթյա ժամկետում հստակեցնել Եվրոպայի հետ ռուբլով գործարքներ իրականացնելու կարգը։ Միևնույն ժամանակ նա հայտարարել է, որ Ռուսաստանը կշարունակի գազ մատակարարել այն ծավալներով և գներով, որոնք արձանագրված են ավելի վաղ կնքված պայմանագրերում, քանի որ երկրի համար կարևոր է սեփական հեղինակությունը: