ԵՐԵՎԱՆ, 29 մարտի – Sputnik. Ռուսաստանի պաշտպանության նախարարությունը և խաղաղապահ զորակազմի հրամանատարությունը հատուկ գործողություններ են ձեռնարկում Լեռնային Ղարաբաղում իրադրության ապաէսկալացիայի ուղղությամբ։ Ամենշաբաթյա ճեպազրույցի ժամանակ տեղեկությունն այսօր հայտնել է Ռուսաստանի ԱԳՆ պաշտոնական ներկայացուցիչ Մարիա Զախարովան:
Նա նշել է, որ ռուսական խաղաղապահ զորախմբի պատասխանատվության գոտում տեղի ունեցող միջադեպերի առնչությամբ Ռուսաստանի դիրքորոշումն արտացոլված է մարտի 26-ի ԱԳՆ հայտարարության մեջ, որտեղ կոչ է արվել ապահովել նոյեմբերի 9-ին բարձր մակարդակով եռակողմ պայմանավորվածությունների անշեղ կատարումը։ Միևնույն ժամանակ նա հավելել է, որ խաղաղապահները գործում են 3 երկրի ղեկավարների հիշյալ հայտարարության դրույթներին համապատասխան։
«Մենք մշտական կապի մեջ ենք Երևանի և Բաքվի ներկայացուցիչների հետ, և օպերատիվ իրավիճակի մասին արդիական տեղեկատվությունը հրապարակվում է Ռուսաստանի պաշտպանության նախարարության ամենօրյա տեղեկագրում»,- նշել է նա:
Զախարովան նաև նշել է, որ Ռուսաստանը շարունակում է ջանքեր գործադրել Հայաստանի և Ադրբեջանի միջև հարաբերությունների կարգավորման ուղղությամբ՝ հենվելով 3 երկրի ղեկավարների ձեռք բերած պայմանավորվածությունների վրա, այդ թվում՝ սահմանագծման և սահմանազատման, տարածաշրջանի հետ տնտեսական և տրանսպորտային կապերի ապաշրջափակման մասով:
ՌԴ ԱԳՆ ներկայացուցիչն ընդգծել է` իրենք ակտիվորեն կաջակցեն նաև Բաքվի և Երևանի միջև խաղաղ պայմանագրի կնքմանը։
Հիշեցնենք` Ադրբեջանի զինված ուժերը մարտի 24-ին` ժամը 16։00-ին, ԼՂ Ասկերանի շրջանի Փառուխ գյուղի ուղղությամբ խախտել են շփման գիծը ու առաջ շարժվել Քարագլխի դիրքերի ուղղությամբ։
Մարտի 25–ի գիշերը նրանք կրակ են բացել ՊԲ ստորաբաժանումների վրա, արդյունքում հայկական կողմից վիրավորում են ստացել 5 պայմանագրային զինծառայողներ։
Մարտի 25-ի կեսօրից Ադրբեջանի ԶՈւ ստորաբաժանումները, բացի հրաձգային զինատեսակներից, կիրառել են նաև հարվածային անօդաչու թռչող սարքեր, այդ թվում` «Bayraktar TB-2»: Հայկական կողմից զոհվել են ՊԲ 3 պայմանագրային զինծառայող, վիրավորները 14-ն են:
Իրավիճակի սրացման պատճառով Խրամորթից տարհանվել են երեխաներն ու կանայք։
Մարտի 29-ի կեսօրի դրությամբ՝ ադրբեջանցիները, չնայած հեռացել են Փարուխից ու այնտեղ ռուս խաղաղապահներ են տեղակայվել, բայց շարունակում են մնալ Քարագլխի դիրքերի մի հատվածում։
Արցախի իշխանություններն ու խաղաղապահները բանակցություններ են վարում նրանց այդտեղից հեռացնելու նպատակով։