ԵՐԵՎԱՆ, 29 մարտի – Sputnik. Ռուսաստանը քննարկում է Հայաստանի Հանրապետության պետական պարտքի մի մասի դուրսգրումը համատեղ կլիմայական նախագծերի իրականացման միջոցով, ասվում է Կրեմլի կայքում:
Այս թեման Ռուսաստանի նախագահի կլիմայի հարցերով հատուկ ներկայացուցիչ Ռուսլան Էդելգերիևը քննարկել է «Կլիմա՝ պարտքի դիմաց» մեխանիզմի գծով Հայաստանի լիազոր ներկայացուցիչ Էրիկ Գրիգորյանի հետ: Սրանք այդ թեմայով Ռուսաստանի առաջին բանակցություններն են մեկ այլ պետության հետ, համենայն դեպս առաջինն են, որոնց մասին հաղորդվում է հրապարակավ։
«Զրույցի ընթացքում քննարկվել են համատեղ կլիմայական նախագծերի իրականացման միջոցով Հայաստանի Հանրապետության պարտքի հաշվանցման հեռանկարները: Նման մոտեցումը թույլ է տալիս նվազեցնել վարկառուի պարտքային բեռը և նպաստել տնտեսության ապակարբոնացման համալիր միջոցառումների անցկացմանը»,-ասվում է հաղորդագրության մեջ:
Կլիմայական ծրագրերը ենթադրում են ջերմոցային գազերի արտանետումների կրճատում կամ դրանց կլանման ավելացում, օրինակ՝ տարածքի կանաչապատման և անտառների տնկման և/կամ արտադրության արդիականացման միջոցով։
Դրանց իրականացման արդյունքում թողարկվում են ածխածնային միավորներ, որոնք հետագայում հնարավոր կլինի վաճառել և գնել, ինչպես սովորական արժեթղթերը։ Նրանք հաստատում են, որ այս կամ այն նախագիծը նպաստել է ջերմոցային գազերի գլոբալ արտանետումների կրճատմանը։
Կրեմլի հաղորդագրության համաձայն՝ Ռուսաստանն ու Հայաստանը նախանշել են «մի շարք հավանական նախագծեր», այդ թվում՝ հիդրոօդերևութաբանական ծառայությունների ներուժի ամրապնդման, հասարակական տրանսպորտի էլեկտրիֆիկացման և կլիմայի փոփոխությանը հարմարվելու ուղղությամբ:
Էդելգերիևն առաջարկել է Փարիզի համաձայնագրի 6-րդ հոդվածի շրջանակներում շուկայական մեխանիզմներ ներգրավել այդ գործում, որոնք կարող են հիմք ծառայել կլիմայական նախագծերի համատեղ իրականացման համար: Այսինքն, ըստ էության, ածխածնային միավորների (օֆսեթների) առք ու վաճառք:
«Փարիզի համաձայնագրի ջերմաստիճանային նպատակներին հասնելու գործում ՌԴ ներդրումը ներառում է կամավոր տեխնոլոգիական աջակցության ցուցաբերում 12 պետությունների, այդ թվում՝ Հայաստանին»,-նշում է Կրեմլը:
Բուն Ռուսաստանում կլիմայական նախագծերի և ածխածնի օֆսեթ շուկայի ինստիտուտը դեռ չի գործարկվել։ Սպասվում է, որ մեխանիզմը կմշակվի Սախալինում ածխածնային փորձարկման ժամանակ, որը մեկնարկելու է այս տարվա մարտի 1-ին: Փորձարկման արդյունքում Սախալինը 2026 թվականին պետք է դառնա Ռուսաստանում առաջին ածխածնի չեզոք սուբյեկտը։