Անցնող գիշեր Հոլիվուդում կայացած «Օսկարի» 94–րդ կինոմրցանակաբաշխության ընթացքում լավագույն ֆիլմ է ճանաչվել Սիան Հեդերի «CODA․ խուլ ծնողների երեխան» կինոնկարը։
Ռեժիսոր Ջեյն Քեմփիոնն ԱՄՆ կինոակադեմիայի «Օսկար» մրցանակի է արժանացել «Շան իշխանություն» ֆիլմի համար։
«Լավագույն տղամարդու դեր» անվանակարգում հաղթել է Ուիլ Սմիթը`«Ռիչարդ արքան» ֆիլմում մարմնավորած կերպարի համար։
«Լավագույն կանացի դեր» անվանակարգում այս տարի արձանիկը տարել է Ջեսիկա Չեստեյնը`«Թեմի Ֆեյի աչքերը» ֆիլմում խաղացած դերի համար։
Մրցանակաբաշխությունը զերծ չի մնացել նաև սկանդալից։ Դերասան Ուիլ Սմիթը ապտակել է վարող Քրիս Ռոքին` դրանով պաշտպանելով իր կնոջը։ Միջադեպը տեղի է ունեցել այն բանից հետո, երբ Ռոքը Սմիթի կնոջ՝ Ջեյդա Փինկետ Սմիթի սանրվածքի վերաբերյալ կատակ է արել։ «Սիրում եմ քեզ, Ջեյդա, չեմ համբերում` երբ եմ քեզ տեսնելու «Զինվոր Ջեյն 2» ֆիլմում», - ասել է հաղորդավարը՝ դերասանուհուն համեմատելով «Զինվոր Ջեյն» ֆիլմում Դեմի Մուրի ճաղատ կերպարի հետ:
Այդ խոսքերից հետո Ուիլ Սմիթը բեմ է բարձրացել և հարվածել գործընկերոջ դեմքին։ Երբ դերասանը վերադարձել է իր տեղը, նա բղավել է, որ Ռոքը չդիպչի իր կնոջը։
Կազմակերպիչները ստիպված են եղել անջատել ձայնը։ Մրցանակաբաշխությունը հեռարձակում է ABC հեռուստաալիքը: