Մեր տարածաշրջանում գնալով ամեն ինչ դառնում է անկանխատեսելի, և ադրբեջանաթուրքական տանդեմի ռազմական հռետորաբանությունից ու գործողություններից հետևում է, որ այդ երկրները շահագրգռված են լարվածության աճով, բայց եթե նրանք փորձեն ՌԴ–ի դեմ Հարավային Կովկասում երկրորդ ճակատ բացել, ապա Իրանը, անշուշտ, հանդես կգա խիստ հայտարարություններով, իսկ Ռուսաստանը` նաև կոշտ քայլերով։ Sputnik Արմենիայի հետ զրույցում այս տեսակետը հայտնեց իրանագետ Գարիկ Միսակյանը։
Նրա խոսքով` թեև Իսլամական հեղափոխության պահապանների կորպուսի հետ փոխկապակցված Telegram–յան ալիքը պաշտոնական աղբյուր չէ, բայցևայնպես Իրանի պաշտոնական դիրքորոշումն արդեն իսկ բազմիցս հնչել է ամենաբարձր մակարդակով, որի համաձայն` մեր հարևան երկիրը ոչ մի կերպ չի հանդուրժի ՀՀ– սահմաններին ուղղված որևէ ոտնձգություն։ Միսակյանը հավելեց, որ հիշյալ հայտարարությունը եղել է թուրքական լրատվամիջոցներից մեկում հակահայկական հոդվածի հիման վրա, ըստ այդմ վկայակոչելով Ուկրաինայի օրինակը` թուրքական լրատվամիջոցն ակնարկում էր, որ ՀՀ–ի դեմ ռազմական գործողություն իրականացնելու միջոցով հնարավոր է լուծել «Զանգեզուրի միջանցքի» խնդիրը։
«Սա նաև Իրանի կարմիր գծերի խախտում է, ուստի այդ պատճառով սոցիալական ցանցերում զետեղվել ու տարածվել է Իրանի Իսլամական հեղափոխության պահպանների կորպուսի հայտարարությունը։ Դատելով Իրանի պաշտոնական հաղորդագրություններից` հարևան երկիրը Բաքվին ավելի վաղ զգուշացրել է, որ չի հանդուրժի իր անմիջական սահմաններին որևէ լարվածություն` զգուշացումներ տալով նաև Սյունիքի մարզի կապակցությամբ»,– ասաց իրանագետը։
Միսակյանը հիշեցրեց, որ Իրանը միշտ խուսափել է ներգրավվել որևէ հակամարտության մեջ, եթե այնտեղ չեն շոշափվում իր կենսական շահերը։
«Բայց եթե մեր տարածաշրջանում փորձեն երկրորդ ճակատ բացել, ապա դա չի բխի Իրանի շահերից, դա կհանգեցնի ավելի մեծածավալ բախման` ներքաշելով նաև Իրանին»,– ասաց իրանագետը` միաժամանակ քիչ հավանական համարելով այդ սցենարը, որովհետև Ադրբեջանը, ըստ նրա, Իրանի հանդեպ նման հանդգնություն չի ցուցաբերի։
Ավելի վաղ ադրբեջանական «Ենի Մուսավաթ» կուսակցության պաշտոնաթերթում Հայաստանի Հանրապետությանը տարածքային հավակնություններ ներկայացնող հերթական ադրբեջանական անհեթեթությունն էր հրապարակվել Լեռնային Ղարաբաղի հիմնախնդրի համատեքստում, որում նշվում էր, թե քանի որ Հայաստանը մեր պատմական հողերից է` մենք իրավունք ունենք վերադարձնելու այն մեր վերահսկողության տակ։
Իրանի Իսլամական Հանրապետության զինված ուժերի հատուկ ճյուղավորումներից մեկը` Իսլամական հեղափոխության պահապանների կորպուսը, պատասխանել է այդ հայտարարությանը` նշելով, որ ցանկացած ռազմական ներխուժում Հայաստանի տարածք կարժանանա Իրանի զինված ուժերի պատասխանին։