ԵՐԵՎԱՆ, 27 մարտի - Sputnik. Երևանում տեղի ունեցած վիճաբանության և դանակահարության հետևանքով 2 երիտասարդ է վիրավորվել։ Ինչպես հայտնում է Shamshyan.com–ը, դեպքը տեղի է ունեցել երեկ՝ մարտի 26-ին: Ժամը 19:30-ի սահմաններում, թիվ 1 Համալսարանական հիվանդանոցից ոստիկանության Քանաքեռ-Զեյթունի բաժին ահազանգ է ստացվել, որ «որովայնի առաջային պատի» ախտորոշմամբ իրենց մոտ է տեղափոխվել մի քաղաքացի։
Հիվանդանոց մեկնած ոստիկաններին և քննիչներին բժիշկները հայտնել են, որ վիրավորն ի վիճակի չէ կատարվածի մասին բացատրություն տալու: Պարզվել է, որ դանակահարված երիտասարդը Երևանի բնակիչ, 23-ամյա Արշակ Խ.-ն է:
Մինչ իրավապահները պարզում էին դեպքի հանգամանքները, ժամը 21:10-ին Քանաքեռ-Զեյթուն բժշկական կենտրոնից ոստիկանություն ահազանգ է ստացվում, որ «ձախ միջին երրորդականի առաջային մակերեսի կտրած վերք, թիկունքի կտրած վերքով» ախտորոշմամբ իրենց մոտ է տեղափոխվել մի քաղաքացի: Ոստիկաններն ու քննիչները թիվ 1 Համալսարանական հիվանդանոցից մեկնել են նշված բժշկական կենտրոն, որտեղ էլ բժիշկները հայտնել են, որ այս վիրավորը նույնպես ի վիճակի չէ կատարվածի մասին բացատրություն տալու:
Պարզվել է, որ նա Երևանի բնակիչ, 33-ամյա Գագիկ Ս.-ն է: Ոստիկաններն ու քննիչները ճշտել են, որ նշված անձինք նույն օրը՝ ժամը 19:30-ի սահմաններում, Ա. Տիգրանյան փողոցի 30 շենքի բակում, վիճաբանություն են ունեցել անհայտ անձի հետ, որը սուր-կտրող-ծակող գործիքով հարվածել է նշված անձանց:
Ձեռնարկելով անհրաժեշտ օպերատիվ-հետախուզական միջոցառումներ` ոստիկանները պարզել են, որ Գագիկ Ս.-ն իր ընկերների` Գեղարքունիքի մարզի բնակիչ, 27-ամյա Արմեն Կ.-ի և Արշակ Խ.-ի հետ գնացել են Ա. Տիգրանյան փողոցի 20 շենքի բակ նույն փողոցի բնակիչ, 47-ամյա Արթուր Գ.-ի հետ ինչ-որ հարցի շուրջ պարզաբանումներ կատարելու, որտեղ էլ տեղի է ունեցել վիճաբանություն ու վերջինս դանակահարել է նրանց:
Ոստիկանները հայտնաբերել են Արմեն Կ.-ին և ներկայացրել Քանաքեռ-Զեյթունի քննչական բաժին: Ձեռնարկվում են անհրաժեշտ միջոցառումներ՝ Արթուր Գ.-ին և հանցագործության գործիք դանակը հայտնաբերելու ուղղությամբ։