ԵՐԵՎԱՆ, 25 մարտի – Sputnik. ՌԴ զինված ուժերը շրջափակել են Կիևը, Խարկովը, Չեռնիգովը, Սումին և Նիկոլաևը։ Տեղեկությունը հայտնել է ՌԴ ԶՈւ գլխավոր շտաբի գլխավոր օպերատիվ վարչության պետ Սերգեյ Ռուդսկոյը։
«Ռուսաստանի Դաշնության զինված ուժերի հարձակողական գործողություններն իրականացվում են տարբեր ուղղություններով։ Արդյունքում ռուսական զորքերը շրջափակել են Կիևը, Խարկովը, Չեռնիգովը, Սումին և Նիկոլաևը»,- նշել է նա։
Ռուդսկոյի խոսքով՝ ռուսական զինված ուժերի լիակատար հսկողության տակ են գտնվում Խերսոնը և Զապորոժիեի շրջանի մեծ մասը:
Միաժամանակ նա հայտնել է, որ Ուկրաինայում ռազմական հատուկ գործողության ընթացքում զոհվել է 1351 ռուս զինվորական, վիրավորվել` 3825-ը։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 30–րդ օրը։