ՌԴ նախագահ Վլադիմիր Պուտինն Արևմուտքում ռուսական մշակույթի վրա հարձակումը համեմատել է հիտլերյան Գերմանիայում տեղի ունեցածի հետ։
«Արգելվում են ռուս գրողներն ու նրանց գրքերը։ Վերջին անգամ ոչ պիտանի գրականության ոչնչացման նման զանգվածային արշավ գրեթե 90 տարի առաջ իրականացրել են նացիստները Գերմանիայում։ Մենք լավ գիտենք, հիշում ենք կինոքրոնիկի կադրերից, թե ինչպես են վառվել գրքերը»,–ասել է Պուտինը մշակույթի բնագավառում նախագահական մրցանակների դափնեկիրների հետ հանդիպմանը:
Նրա խոսքով՝ Ռուսաստանում նման բան պատկերացնել հնարավոր չէ. այնտեղ էթնիկ անհանդուրժողականությանը տեղ չունի։ Մինչդեռ Արևմուտքում ծաղկում է խտրական դրսևորումն այն ամենի առնչությամբ, ինչ կապված է Ռուսաստանի հետ։
ՌԴ նախագահը կարծում է, որ Արևմուտքում ծաղկում է այսպես կոչված «չեղարկման մշակույթ», օստրակիսմոսը և փաստերը լռության մատնելը, որոնք չեն տեղավորվում դրանց կաղապարների մեջ։
Ինչպես նշել է Պուտինը` Հոլիվուդում մի քանի անգամ ֆիլմեր են թողարկվել, որտեղ նացիզմի միակ հաղթողը Միացյալ Նահանգներն էր: Ընդ որում, քաջությունն ու հերոսությունը, Կարմիր բանակի հաղթանակը պարզապես վերցրել ու «չեղարկել» են։
Շնորհավորելով ռուս մշակութային գործիչներին մասնագիտական տոնի առթիվ՝ ՌԴ նախագահը նշել է, որ ռուսական մշակույթը միշտ ուղղված է մարդուն, ռուսական ստեղծագործությունները սովորեցնում են մտածել։
«Մեծ ու անսպառ մշակույթն արտացոլում է մեր բազմազգ ժողովրդի հոգևոր, պատմական ժառանգության ու ավանդույթների ողջ բազմազանությունը։ Ծառայում է մեր միասնականության ամրապնդմանը»,–ասել է Պուտինը։
Նա հույս ունի, որ մշակույթի միջոցով Ռուսաստանի մասին ճշմարտությունը ճանապարհ կհարթի աշխարհում։