ԵՐԵՎԱՆ, 25 մարտի – Sputnik. Արաբկիր վարչական շրջանում քանդվում են համայնքային հողամասերում գտնվող ապօրինի ավտոտնակները։ Նման տեղեկություն է հայտնում Երևանի քաղաքապետարանը` ֆեյսբուքյան իր էջում լուսանկարներ տեղադրելով։
Մասնավորապես, քանդվում են Արաբկիրի Մամիկոնյանց և Արամ Խաչատրյան փողոցների հարևանությամբ համայնքային հողամասերում առանց համապատասխան թույլտվության տեղակայված ավտոտնակները։
Արաբկիրում քանդվում են համայնքային հողամասերում գտնվող ապօրինի ավտոտնակները
© Photo : press office of Yerevan municipality
Արաբկիր վարչական շրջանի ղեկավարի աշխատակազմում հարուցվել էր վարչական վարույթ, կայացվել են նաև Երևանի քաղաքապետի համապատասխան որոշումներ։
Ավտոտնակների գտնվելու վայրը կառավարության 2020 թվականի դեկտեմբերի 24-ի՝ «Երևան քաղաքի Մամիկոնյանց և Արամ Խաչատրյան փողոցներին հարակից տարածքների նկատմամբ հանրության գերակա շահ ճանաչելու մասին» տարածքների ցանկում է։
Արաբկիրում քանդվում են համայնքային հողամասերում գտնվող ապօրինի ավտոտնակները
© Photo : press office of Yerevan municipality
Համայնքային հողամասը շինություններից ազատելուն կհաջորդի Երևանի Մամիկոնյանց և Արամ Խաչատրյան փողոցները միացնող ճանապարհահատվածի կառուցումը։ Սրա նպատակը Կոմիտասի պողոտայով երթևեկությունը բեռնաթափելն է: