ԵՐԵՎԱՆ, 24 մարտի – Sputnik. ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է ֆրանսիական «Charlie Hebdo» երգիծական ամսագրի ծաղրանկարները, որոնցում ուկրաինացի փախստականներին համեմատում են կենդանիների հետ։
«Ի դեպ, ի՞նչ կասեք Ֆրանսիայի ԱԳՆ ղեկավարին «Charlie Hebdo»-ի մասին, տեսե՞լ է, հետևո՞ւմ է, թե՞ ոչ, եթե չի հետևում, կարող եմ ասել, որ այս հումորային ամսագրում ուկրաինացիներին կենդանիներ են անվանում»,- ճեպազրույցի ժամանակ ասել է Զախարովան։
Ըստ նրա՝ եթե ինչ-որ մեկը խոսում է խաղաղ բնակչության պաշտպանության մասին, պետք է հետևել, թե ինչպես են լրատվամիջոցները խոսում նրանց մասին։
«Որտե՞ղ կա թեկուզ նվազագույն հարգանք այն մարդկանց նկատմամբ, որոնք ստիպված են եղել լքել իրենց երկիրը և ընդհանրապես ապաստան փնտրել ողջ Եվրոպայում, որոնց ուժով թույլ չեն տալիս մտնել Ռուսաստանի Դաշնության տարածք»,- ընդգծել է նա։
Ավելի վաղ ցանցում հայտնվել էին ֆրանսիական «Charlie Hebdo» երգիծական ամսագրի նյութերը, որը հայտնի է մուսուլմանների դեմ ծաղրանկարներով։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 29–րդ օրը։