ԵՐԵՎԱՆ, 24 մարտի – Sputnik. ՀՀ իշխանությունը հերթական փոփոխությունն է առաջարկել Շահումով խաղերի, խաղատների ու վիճակախաղերի գործունեությունը համակարգող օրենքներում։
ԱԺ «Քաղաքացիական պայմանագիր» խմբակցության մի խումբ պատգամավորների հեղինակած նախագծով առաջարկվում է խաղացողներին արգելել խաղադրույքներ կատարել էլեկտրոնային դրամապանակների միջոցով։ Միակ բացառությունը կսահմանվի խաղատներում ՀՀ քաղաքացի չհանդիսացող անձանց համար։
Կառավարության այսօրվա նիստում նախագիծն արժանացավ գործադրի հավանությանն ու առաջիկայում կներկայացվի խորհրդարանի քննարկմանն ու հաստատմանը։
Նախագծի քննարկման ընթացքում Փաշինյանը կարևորեց նոր սահմանափակման անհրաժեշտությունը` հայտնելով, որ միայն 2021թ–ին կատարվել է 3 տրիլիոն 900 մլրդ խաղադրույք։
«Սա մեր երկրի պետական բյուջեի կրկնակիից ավելի ցուցանիշ է»,– ասաց Փաշինյանը։
Հիշեցնենք` մոլախաղի գովազդի սահմանափակումները ՀՀ–ում գործում էին մինչև 2020 թվականի հունվարի 1-ը։ Սակայն դրանից հետո առցանց կազինոների և խաղարկությունների համար բացառություն արվեց` թույլատրելով դրանց արտաքին գովազդը` գովազդային վահանակների վրա, ինտերնետում, հեռուստատեսությամբ և ռադիոյով:
Պարզելու համար, թե ինչպես է ազդել առցանց մոլախաղերի գովազդը հասարակության վրա, ֆինանսների նախարարությունը ՊԵԿ-ից պահանջել էր այս բիզնեսի կազմակերպիչների՝ Vivaro Group (այժմ՝ Soft Construct), Digitaline, Kabarko և Good Soft-ի ֆինանսական հաշվետվությունները։
Պարզվել էր, որ 2018 թվականին խաղացողները 333 միլիարդ դրամի խաղադրույք են կատարել, իսկ 2020 թվականի 10 ամիսների ընթացքում` 1 տրիլիոն 547 միլիարդ դրամի։ 2018 –ին խաղացողների թիվը կազմել է ամսական միջինը 18 093 մարդ, իսկ 2020–ն` 44 082։