ԵՐԵՎԱՆ, 23 մարտի – Sputnik. Հայաստանն ու Ռուսաստանը ցանկանում են դրամ-ռուբլի արժութային սվոփեր ներդնել ազգային արժույթներով առևտուրը պաշտպանելու համար։ Այս մասին խորհրդարանում հայտարարեց էկոնոմիկայի նախարար Վահան Քերոբյանը՝ պատասխանելով պատգամավորների հարցերին։
Ներկայում արտահանողները մեծ ռիսկ ունեն ռուբլով ապրանքներ արտահանելիս (իսկ Ռուսաստանում դոլարով ապրանքներ վաճառելը դժվար է՝ հաշվի առնելով ռուբլու հետ փոխարժեքը)։
Այս կապակցությամբ` մի կողմից ԿԲ–ն և ՀՀ էկոնոմիկայի նախարարությունը, մյուս կողմից էլ ԿԲ-ն ու ՌԴ արդյունաբերության և առևտրի նախարարությունը բանակցություններ են վարում դրամ-ռուբլի սվոփերի ստեղծման հնարավորության մասին։ Այդ դեպքում հայ արտահանողները կարող են գները ներկայացնել դրամով, իսկ նրանց գնորդները (ռուսական դիստրիբյուտորներն ու առևտրային ցանցերը)՝ ռուբլով ստանալ։
«Այսպիսով, փոխադարձ առևտրի դեպքում, մենք կարող ենք զգալիորեն նվազեցնել բիզնեսի համար ռիսկերը»,- նշեց Քերոբյանը:
Հիշեցնենք, որ արժութային սվոփը ենթադրում է գումարների փոխանակում տարբեր արժույթներով՝ որոշակի ժամանակ անց դրանք նույն ծավալներով վերադարձնելու պայմանով։ Օրինակ՝ հայկական բանկը ռուսական բանկին փոխանցում է 5 միլիոն դրամ՝ նրանից ստանալով 1 միլիոն ռուբլի։ Ստացված դրամները ռուսական բանկը կարող է փոխանցել սուպերմարկետին, որպեսզի վերջինս հատուցի հայկական պահածոների գործարանին։ Այս դեպքում բիզնեսը չի մտածում, թե ինչպես պետք է փոխանակել գումար, և կարող է կորցնել փոխարժեքի տարբերության մեջ։
Խնդիրն այն է, որ այդ մասին պետք է մտածեն բանկերը, այդ իսկ պատճառով այժմ Հայաստանում գրեթե ոչ մի բանկ ռուբլու սվոփ չի տալիս։ Ուժեղ տատանումների ժամանակ, ինչպես հիմա է, սվոփի 2 մասնակիցն էլ ռիսկի են դիմում։ Օրինակ, հիմա հայկական բանկը վերցնում է 1 միլիոն ռուբլի, տալիս 5 միլիոն դրամ։ Մեկ ամսից ռուբլու փոխարժեքը բարձրանում է 5-ից մինչև 5,5: Վերցված միլիոն ռուբլին վերադարձնելու համար բանկը պետք է գնի դրանք ավելի բարձր փոխարժեքով։ Այդպիսով նա կկորցնի 500 հազար։