Կրկեսը կշարժվի օրենքով, կհրավիրվեն այնպիսի դերասաններ, որոնք վայրի կենդանիներ չունեն, թեպետ այդպես կրկեսի համար այնքան էլ լավ չի լինի։ Այս մասին Sputnik Արմենիայի եթերում ասաց Երևանի կրկեսի գեղարվեստական ղեկավար, պրոֆեսոր Սոս Պետրոսյանը՝ մեկնաբանելով կրկեսում վայրի կենդանիների օգտագործումն արգելելու մասին ԱԺ ընդունած որոշումը։
«Առաջ մենք մեր հին կրկեսում, քանի որ պայմաններն այնքան էլ լավ չէին, չէինք կարող հրավիրել ակրոբատիկական թռիչքային ատրակցիոններ ու տեսարաններ, որովհետև, նախ բարձրությունը 18 մ էր, հետո՝ հնարավորություն չկար այդպիսի թռիչքային ատրակցիոններ բերել։ Նոր կրկեսը բազմաֆունկցիոնալ կրկես է լինելու, այդ բացը դրանով կլրացնենք։ Կարծում եմ՝ ժողովուրդը պակաս չի զգա»,-ասաց Պետրոսյանը։
Նա կարծում է, որ ամեն դեպքում այս որոշումը կրկեսին, որպես բիզնես, վնասելու է, որովհետև մարդիկ երբ իմանան, որ վայրի կենդանիներ չկան, տոմս քիչ են գնելու։
Թե ինչով կզբաղվեն այն կենդանավարժները, որոնք հենց վայրի կենդանիների հետ էին ներկայանում, հարց է։
Պետրոսյանի խոսքով՝ Հայաստանում նրանց թիվը մեծ չէ, մեկ-երկու հոգի են։ Կրկեսն էլ, իրականում, հյուրախաղային կառույց է, եթե նախկինում պլանավորվում էր Երևան հրավիրել այնպիսի դերասանների, որոնք վայրի կենդանիներ հետ են ներկայանում, ապա հիմա կհրավիրվեն նրանք, ովքեր այլ ժանրերում են ներկայանում։
Կրկեսի տնօրենը նաև անհասկանալի է համարում մարդկանց պատկերացումները, թե կրկեսում կենդանիներ են պահվում։
«Գազանանոց չէ,- ասում է նա,-կենդանիներ չկան, ուզում էինք կրկեսի բացմանը հրավիրել դերասանների, ովքեր վայրի կենդանիների հետ են ներկայանում, հիմա եթե չի կարելի, չենք հրավիրի»։
Պետրոսյանը հավելեց, որ մինչև եկող տարվա կեսը Երևանի կրկեսը հավանաբար կբացի իր դռներն այցելուների առաջ, հիմա ընթանում է շինարարության վերջին փուլը։
Ներքին հարդարման շինարարությունն է սկսվել, Պետրոսյանի տվյալներով՝ մի քանի օրից տեղում կլինեն հատուկ կրկեսային բազկաթոռները, լուսային ու ձայնային էֆեկտները։
Հիշեցնենք, որ այսօր՝ մարտի 23-ին, ՀՀ ԱԺ-ն երկրորդ ընթերցմամբ ընդունեց կառավարության ներկայացրած օրենքի նախագիծը, համաձայն որի` կրկեսներում կարգելվի օգտագործել լիազորված մարմնի կողմից հաստատված ցանկում ընդգրկված վայրի կենդանիներին։