ԵՐԵՎԱՆ, 22 մարտի – Sputnik. Ֆրանսիական նավթագազային TotalEnergies ընկերությունը որոշել է չկնքել և չերկարաձգել ռուսական նավթի և նավթամթերքի գնման պայմանագրերը։
«Հաշվի առնելով Ուկրաինայում վատթարացող իրավիճակը և Եվրոպա նավթամթերքի մատակարարման այլընտրանքային աղբյուրները, TotalEnergies-ը միակողմանի որոշում է չկնքել կամ չերկարաձգել ռուսական նավթի և նավթամթերքի գնման պայմանագրերը, որպեսզի շուտափույթ դադարեցնի ռուսական նավթի կամ նավթամթերքի բոլոր գնումները ոչ ուշ, քան մինչև 2022 թվականի տարեվերջ»,- նշված է ընկերության հաղորդագրության մեջ։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 27–րդ օրը։