ԵՐԵՎԱՆ, 22 մարտի – Sputnik. ԱՄՆ նախագահ Ջո Բայդենը գործարարների հետ հանդիպմանը հայտարարել է, որ ռուսական «Կինժալ» հրթիռը գրեթե անհնար է կանգնեցնել։ Նրա ասածը մեջբերում է ՌԻԱ Նովոստին։
«Ինչպես ցանկացած այլ հրթիռ, «Կինժալն» էլ նույնպիսի մարտագլխիկ ունի։ Մեծ տարբերություն չկա, բացի նրանից, որ այն գրեթե անհնար է կանգնեցնել», – ասել է Բայդենը։
Ավելի վաղ ՌԴ ՊՆ–ն հայտնել էր, որ ռազմական հատուկ գործողությունների ընթացքում առաջին անգամ «Կինժալ» գերձայնային հրթիռ է կիրառվել` Իվանո–Ֆրանկովսկի շրջանում ոչնչացնելով «ուկրաինական Տոչկա-Ու» մարտավարական հրթիռների համար նախատեսված մարտական մասերի ստորգետնյա պահեստը։ Արագության և գերբարձր կինետիկ էներգիայի շնորհիվ հրթիռի մարտական մասը խոցել է լեռնային տեղանքում գտնվող պաշտպանված զինանոցը։
Ավելի վաղ Պենտագոնը հայտարարել էր, որ չի կարող հաստատել կամ հերքել «Կինժալի» գործարկման մասին ռուս զինվորականների հայտարարությունները։ ԱՄՆ ռազմական գերատեսչության բարձրաստիճան ներկայացուցիչը լրագրողներին ասել էր, որ Պենտագոնին անհասկանալի է նման զենքի կիրառումը։ Նա ենթադրել էր, որ ՌԴ–ն դրանով ցանկացել է ազդանշան ուղարկել «Արևմուտքին և Ուկրաինային» և լրացուցիչ միավորներ վաստակել հակամարտության կարգավորման վերաբերյալ շարունակվող բանակցությունների համար։
ԱՄՆ–ում ներկա պահին գերձայնային զենքի փորձարկումներ են ընթանում, մի քանի փորձնական արձակում անհաջող է ավարտվել, սպառազինությունը նման հրթիռներով համալրված չէ։
Իվանո–Ֆրանկովսկից բացի, Ռուսաստանը «Կինժալ» է կիրառել Նիկոլաևսկի մարզի Կոնստանտինովկա բնակավայրի շրջանում Ուկրաինայի ԶՈւ վառելիքաքսուքային նյութերի խոշոր պահեստի ոչնչացման համար։ ՌԴ ՊՆ պաշտոնական ներկայացուցիչ, գեներալ–մայոր Իգոր Կոնաշենկովը պարզաբանել է, որ նման որոշումը պայմանավորված է եղել ցանկացած ՀՕՊ միջոցների համար հրթիռի անտեսանելիությամբ ու անխոցելիությամբ։
Ըստ նրա` ավիացիան հրթիռային համալիրի կիրառումը ապացուցել է դրա արդյունավետությունը բարձր պաշտպանության հատուկ օբյեկտների ոչնչացման առումով և այն շարունակվելու է։