ԵՐԵՎԱՆ, 22 մարտի – Sputnik. Արդեն որերորդ անգամ ԱԺ նախագահ Ալեն Սիմոնյանը խորհրդարանի լիագումար նիստերի օրերին մեծ խմբով մեկնում է գործուղման, իսկ իրականում` պետական բյուջեի հաշվին տուրիստական շրջագայության։ Նման հայտարարությամբ այսօր ԱԺ–նիստի ժամանակ հանդես եկավ ԱԺ «Հայաստան» խմբակցության պատգամավոր Արեգնազ Մանուկյանը` բացակայող ԱԺ նախագահի փոխարեն հարցն ուղղելով նրա տեղակալ Ռուբեն Ռուբինյանին։
«Ինչո՞վ է պայմանավորված 11–հոգանոց պատվիրակության այցը Ինդոնեզիա, ինչքա՞ն է դա նստելու ՀՀ հպարտ հարկատուների վրա, ինչ արդյունքներ է ստանալու Հայաստանը Սիմոնյանի այդ այցից»,– ասաց պատգամավորը։
ԱԺ փոխնախագահը պատասխանեց, որ Ալեն Սիմոնյանը մեկնել է Ինդոնեզիա ոչ թե շրջագայության, այլ որպես միջխորհրդարանական միությունում ՀՀ ԱԺ պատվիրակության ղեկավար։
«Գոյություն ունի ԱԺ պաշտոնական կայք, որտեղ հրապարակվում են ԱԺ նախագահի որոշումները, ներկայացվում են բոլոր պատվիրակությունների այցերի նպատակները, ծախսերը, կազմերը, պարբերաբար տրվում են հաշվետվություններ։ Տեղեկացնեմ նաև, որ ձեր նշած «շրջագայությունների» ընթացքում, ցավոք միայն ՔՊ պատգամավորներն են մեկնում և բարձրաձայնում այն հարցերը, որոնք բխում են ՀՀ–ի և Արցախի շահերից»,– ասաց Ռուբինյանը։
Ընդդիմադիր պատգամավորը, սակայն, չհամաձայնեց` նշելով, որ այդ այցերը «զրո» արդյունք են տալիս Հայաստանին, բայց «լիքը անձնական տպավորություններ» ՔՊ պատգամավորներին։
Հիշեցնենք` մարտի 20-ին ՀՀ ԱԺ նախագահ Ալեն Սիմոնյանի գլխավորած պատվիրակությունը մեկնել է Ինդոնեզիայի Բալի կղզի` մասնակցելու Միջխորհրդարանական միության 144-րդ վեհաժողովի հանդիսավոր բացման արարողությանը: Վեհաժողովին ներկա 110 երկրի խորհրդարանների պատվիրակները ներկայացված են առաջին դեմքերով, նախատեսված են առանձին հանդիպում-քննարկումներ պատգամավորների և գլխավոր քարտուղարների համար:
ԱԺ կայքում հրապարակված տեղեկատվության համաձայն` պատվիրակության կազմում են ՔՊ պատգամավորներ Հասմիկ Հակոբյանը, Ծովինար Վարդանյանը, Ազգային ժողովի աշխատակազմի ղեկավար-գլխավոր քարտուղար Վահան Նարիբեկյանը, նրա տեղակալ Հեղինե Խաչիկյանը, Ազգային ժողովի նախագահի օգնական Դավիթ Առաքելյանը, Ազգային ժողովի արտաքին կապերի վարչության պետ Տիգրան Սեյրանյանը, արարողակարգի վարչության պետ Հակոբ Հաջի–Հակոբյանը, ԱԺ արտաքին կապերի վարչության միջազգային կազմակերպությունների բաժնի գլխավոր մասնագետ Զաբելա Ղազարյանը, արարողակարգի վարչության այցերի և ընդունելությունների կազմակերպման բաժնի պետ Մամիկոն Մարգարյանը, հասարակայնության հետ կապերի և հաղորդակցության վարչության լրատվության արտադրության բաժնի լուսանկարիչ-օպերատոր Դավիթ Հակոբյանը։
Ընդ որում, թեև այցի պաշտոնական մասը տեղի է ունենալու մարտի 20-23-ը, բայց պատվիրակության որոշ անդամներ Բալի են մեկնելու մարտի 18-ին ու վերադառնան 26-ին։